Мадзал баст уыд сылгоймæгты æппæтадæмон бонимæ æмæ Фыдыбæстæйы Стыр хæсты Уæлахизы 75 азы бонимæ
Уæрæсейы сылгоймæгты Цæдисы хъæппæрисæй Дзæуджыхъæуы 40-æм скъолайы арæзт æрцыд сæрмагонд акци «Волна памяти» – «Женское лицо Победы». Мадзал баст уыд сылгоймæгты æппæтадæмон бонимæ æмæ Фыдыбæстæйы Стыр хæсты Уæлахизы 75 азы бонимæ. Йæ саразыныл бакуыстой скъоладзаутæ сæхæдæг дæр. Куыд загътой, афтæмæй ахсджиаг у нæ бæстæйы цытджын истори хъуыды кæнын. Хицæн ныхасы аккаг у уый, æмæ йæ хъæбатыр сыфтæ фыстой сылгоймæгтæ дæр. Зын рæстæджыты сæдæгай мин сылгоймаджы сыстадысты Фыдыбæстæ хъахъхъæнынмæ. Сæхи æвдыстой хъæбатырæй куыд фронты, афтæ фæсчъылдымы дæр. Дунейы иунæг бæстæ дæр ахæм историйæ нæ раппæлдзæн. Æмæ абон ахсджиаг у, æцæг патриоты, хъæбатыры, фæллойгæнæджы æмæ салдаты мады сурæт бахъахъхъæнын. Ацы бонты 110 азы сæххæст легендарон тæхæг, Советон Цæдисы хъæбатыр, фашистты ныхмæ арæзт советон сылгоймæгты комитеты сæрдар Валентина Гризодубовайы райгуырдыл. Комитет арæзт æрцыд 1941-æм азы сентябры. Уый фæстæ – 1992-æм азы йæ хæстæ æххæст кæнын райдыдта Уæрæсейы сылгоймæгты Цæдис. Ацы бон ма æрымысыдысты нæ зындгонд æмзæххон тæхæг, Фарныхъæуккаг ныфсхаст чызг Дауыраты Илитæйы сгуыхтдзинæдтæ дæр.
