Хæрзаудæн акцийæн æвдисæн уыдысты нæ телерадиокомпанийы кусджытæ дæр
Сæ хæдзæртты ныртæккæ бирæтæ бадынц. Уæлдайдæр та фæсарæйнаг бæстæтæй чи рбацыд, уыдон, стæй хистæр кары адæм. Уыдонæн баххуыс кæнынæн фæзынд, социалон бизнес кæй хонынц, уый. Волонтертимæ иумæ сын бацæттæ кодтой æнæмæнг хъæугæ хойраджы продукттæ, æмæ сын сæ бахастой. Хæрзаудæн акцийæн æвдисæн уыдысты нæ телерадиокомпанийы кусджытæ дæр.
Ацы пакетты нымæц хæццæ кæны 200-мæ. Сæ хуылфы та – фыццаджыдæр чи хъæуы, ахæм продукттæ. Ахæм æххуыс сæмбырд кодтой, социалон æгъдауæй бæрнон амалхъом адæм.
Коронавирусы ныхмæ тохгæнæн штабы кусынц æхсæвæй-бонæй. Ардæм курдиæттæ æрбацæуынц ацæргæ, фæкæсынхъуаг адæмæй, стæй æнæ искæйы ххуысæй йæ бон рацæуын кæмæн нæу, уыдонæй. Пайда кæнынц фæллойы æмæ социалон хъахъхъæнынады министрады информацийæ.
Йæ рудзынгæй æххуыс райста Бататы Ольгæ дæр. Сылгоймаг æппындæр нæ рацæуы йæ хæдзарæй.
Йе ххуысы къух чи бадардта, уыдонæй иу у Дзахсорты Таймураз. Ацы зын рæстæг æй иу ран бадын нæ бафæндыд, фæлæ адæмæн æххуыс кæнын.
Æххуыс райсыны тыххæй бадзурæн ис комкоммæ телефоны 2 номырмæ: æппæтуæрæсеон адæмон фронтмæ: 8 (800) 200-34-11, регионалон штабмæ та: 70-70-08.
