Уый бахъуыд, Советон Цæдисы ахадындзинад Фыдыбæстæйы Стыр хæсты рæстæг мынæг кæнын куы райдыдтой, уæд
Патриотизм конституцийы дæлбар. Историйы рæстдзинад бахъахъхъæныны фæдыл сæрмагонд ивддзинæдтæ бахастой нæ бæстæйы сæйраг закъонмæ. Уый бахъуыд, Советон Цæдисы ахадындзинад Фыдыбæстæйы Стыр хæсты рæстæг мынæг кæнын куы райдыдтой, уæд.
Уæрæсейы нæй ахæм бинонтæ, æмæ Фыдыбæстæйы Стыр хæсты цæхæр кæй нæ басыгъта. Уымæ гæсгæ нæ хæс у хæствæллад салдаты ном бахъахъхъæнын. Авиацийы ветеран Бедойты Руслан у æфсæддон бинонтæй. Йæ фыд уыд хæстон æмæ йæ фæнд у, цæмæй нæ ивгъуыды истори ма фæчъизи уа.
Политикон хъæзтытæ æмæ нæ бæстæйыл цъыфкалæнтæ райдыдтой гыццылгай уыимæ ма сæм, 75 азы размæ Сырх æфсады æххуысмæ цы бæстæтæ æнхъæлмæ кастысты, уыдоны æфтаугæйæ. Æмæ нæ паддзахады хæс у Уæлахизы номыл конституцимæ ивдзинæдтæ бахæссын. Стæй ма Бедойты Русланы хъуыдымæ гæсгæ хъæуы фæсивæдимæ кусын.
Æвзонг историк Мырыкаты Артемий, зæгъæн ис, æмæ Томайты Сæрдионы хæстæджытæн раргом кодта йæ хæстон фæндаг. Лæппумæ стыр цымыдисдзинад æвзæрын кæнынц ивгъуыд хæстон азтæ, уый, зæгъæн ис, æмæ сси йæ царды иу хай. Архайы бирæ проектты. Зæгъæм Мидхъуыддæгты министрады «Барбашовы фæз»-ы проектæн æмбырд кæны хæстонты къамтæ. Чиныг «Имена Победы»-йы та æнæхъæн сæргонд снывонд кодта Плиты Иссæйæн. Ныффыста Советон Цæдисы маршал Рокоссовскийы чызджы тыххæй.
Конституцимæ цы ивдзинæдтæ хъавынц бахæссын, уыдонæй иу у – патриотизм бахъахъхъæнын. Æмæ ма зæгъыдзыстæм, кæд нæм ис ахæм фæзминаг кæстæртæ куыд Мырыкаты Артемий æмæ куырыхон хистæртæ куыд Бедойты Руслан, уæд, зæгъæн ис, æмæ историйæн фæкъахыр кæнæн нæй.
