Не сфæлдыстадон къорд федта, рынчындон куыд ифтонг у, уый
Абонæй фæстæмæ коронавирусæй рынчынты дзæбæх кæнын райдыдтой республиæйы клиникон рынчындоны дæр. Дзæбæхгæнæн кусæнуат ифтонг у æппæт хъæугæ фæрæзтæй. Не сфæлдыстадон къорд федта, рынчындон куыд ифтонг у, уый.
Хи хъахъхъæны фæрæзтæ сты мæйы фаг. Республикон клиникон рынчындонмæ æрбаластой, коронавирусæй рынчынтæм кæсынмæ цы хъæуы, уыдон. Маскæтæ, кæсæнцæстытæ, æхгæд уæлæдарæс æмæ æндæр фæрæзтæ, алцы дæр чъизи фæзуат кæй хонынц, уым кусынæн цы хъæуы.
Коронавирусæй чи фæрынчын уа, æмæ семæ чи кусдзæн, уыдонæн радтой амынддзинæдтæ. Фæсидт сæм Митциты Астан.
Республикон клиникон рынчындоны пациентты раивтой Дзæуджыхъæуы æмæ районты дзæбæхгæнæндæттæм. Уым сæ дзæбæх кæндзысты. Республикон клиникон рынчындонмæ та ласдзысты коронавирусимæ.
Абонæй фæстæмæ райдайдзысты фыццаг рынчынты исын. Дзæбæх сæ кæндзысты дыууæуæладзыгон корпусы. Фыццаг уæладзыджы уыдзысты тыхстдæр чи у, уыцы рынчынты. Палатæтæ ифтонг сты æппæт аппараттæй. Зынг зæгъынæй ком нæ судзы, фæлæ эпидемийы рæстæг байгом кæндзысты æндæр хайæдтæ дæр.
Æмтгæй райсгæйæ республикон клиникон рынчындон цæттæ у уыцы-иу рæстæг 350 рынчыны дзæбæх кæнынмæ.
