Ног кусæнгарз фадат ратдзæн диагностикæйы хæрзхъæддзинад фæхуыздæр кæнынæн
Цæгат Ирыстоны Сæргълæууæг Битарты Вячеслав бабар кодта, тагъд æххуысы клиникон рынчындонмæ цы компьютерон томограф баластой, уый эксплуатацимæ раттыны мгъуыд фæтагъддæр кæнын. Ног кусæнгарз фадат ратдзæн диагностикæйы хæрзхъæддзинад фæхуыздæр кæнынæн. Уый та ахсджиаг у коронавирус парахат кæнын ма бауадзыны рæстæг.
Ахæм уынаффæ хаст æрцыд Уæрæсейы Хицауады цур координацион советы Президиумы æмбырды фæстæ. Амыдта йæ нæ бæстæйы хицауады сæрдар Михаил Мишустин. Регионты разамонджытимæ ныхас уыд видеоконференцийы хуызы. Хицауады сæрдар куыд бафиппайдта, афтæмæй федералон бюджетæй уæрæсейаг регионтæм арвыстой сæрмагонд фæрæзтæ, актуалон фарстатæ лыг кæнынæн. Битарты Вячеслав куыд загъта, афтæмæй ныртæккæ ахсджиаг у æппынæдзухдæр профилон министрадтимæ æмгуыстад кæнын.
