Уавæр хынцгæйæ, чысыл æмæ астæуккаг бизнесменты æххуысæн сфидар кодтой цалдæр уагæвæрды
Видеобастдзинады фæрцы республикæйы сæргълæууæг æрдзырдта, экономикæйы райрæзтмæ æвæрæн цы штаб хæссы, уый уæнгтимæ. Уавæр хынцгæйæ, чысыл æмæ астæуккаг бизнесменты æххуысæн сфидар кодтой цалдæр уагæвæрды. Афтæ йæ базаргæнæн 200 квадратон метрæй фылдæр кæмæн нæу, уыдонæн радтой куысты бар. Фæлæ сæ æххæст кæнын хъæуы сæрмагонд фæткы домæнтæ.
Хицауады уæнгтæ сæ радон æмбырды сфидар кодтой, республикæйы экономикон райрæзтмæ æвæрæн чи хæссы, уыцы куыстуæттæ. Сты 182. Хауынц сæм агропромышленнон комплекс, арæзтад, промышленность, цæрæнæуæтты-коммуналон хæдзарад, æнæнниздзинадхъахъхъæнынады, артаг æмæ энергетикæйы комплекс. Ома адæм фылдæр кæм фæллой кæны æмæ хъалонтæ чи хæссы, уыцы организацитæ.
Экономикон рæзты министр Томайты Хъазыбег куыд радзырдта, афтæмæй республикон фæрæзтæй 150 милуан сомæй фæхъæздыгдæр микрофинансты фонд. Федералон фæрæзтæй æнхъæлмæ кæсынц 100 милуанмæ. Сæ фæрцы æнæпроцентон кредиты æппæты фылдæр бæрц 300 минæй суыдзæн 500 мин сомы. Уый амалхъом адæмæн фадат ратдзæн сæ дæлбар куысджыты мызд бафидынæн. Абоны онг 6 курдиатæй æнæпроцентон кредит райстой 4 амалхъом адæймаджы. Фæнысан ма кодта, федералон закъоны ивддзинæдтæ фадат кæй дæттынц фиддонтæ 6 мæйы фæстæдæрмæ адæргъвæтин кæнынæн.
Парламенты депутат Дмитрий Дюбуа та радзырдта, хæрзаудæн фонд «Ирыстон» коронавирусы ныхмæ кусæг медицинон персоналæн куыд æххуыс кæны, уый тыххæй. Фонды фæрæзтæ сты 30 милуан сомы. Уыдонæй 10 милуанæн самал кодтой хи хъахъхъæнæн фæрæзтæ – сæрмагонд уæлæдарæс, маскæтæ, æмæ æндæр хъæугæ дзаумæттæ.
Ацы фонд арæзт уыд Битарты Вячеславы хъæппæрисæй æмæ йæм се вæрæн хæссынц амалхъом адæм.
