Уæлахизы боны агъоммæ федтой Алагиры районы дæрддзæф хъæуты мемориалон фæйнæджытæ цы уавæры сты, уый
Æппæтуæрæсеон адæмон фронты регионалон штабы уæнгтæ бакодтой радон бæрæггæнæн куыст. Уæлахизы боны агъоммæ федтой Алагиры районы дæрддзæф хъæуты мемориалон фæйнæджытæ цы уавæры сты, уый. Бахæццæ сты суанг Дæллаг Зæрæмæджы æмæ Нары онг. Цыртдзæвæнты уавæрæй, æмтгæй райсгæйæ, баззадысты разыйæ.
75 азы размæ Алагиры районы 7 мин адæймагæй фылдæр атырныдтой Фыдыбæстæйы Стыр хæсты рæстæг райгуырæн зæхх хъахъхъæнынмæ. Уыдонæй 3 минæй фылдæр сæ фыдыуæзæгыл нал сæмбæлдысты. Алкæйы ном дæр фыст æрцыд, районы алы рæтты цы мемориалон фæйнæджытæ ис, уым. Се мзæххонты нæмттæ æрымысынмæ алы 9-æм майы дæр цыртдзæвæнтæм æрбацæуынц мингай адæмтæ. Активон аивгæнæн куыст цæуы Нузалы дæр.
Æппæтуæрæсеон адæмон фронты эксперттæ бæрæггæнæн куыст бакодтой нæ республикæйы арæнтæм хæстæг цыртдзæвæнтыл дæр. Бахæццæ сты суанг Дæллаг Зæрæмæгмæ æмæ Нармæ. Мемориалты уавæрмæ æхсæнадон кусджытæ ницы аиппытæ æрхастой. Æрмæст сæ хъæуы бындуронæй бафснайын.
Мызуры та, Фыдыбæстæйы Стыр хæсты чи фæмард, уыцы æмхъæуккæгты номыл цыртдзæвæн, зæгъæн ис, æмæ æрæджы фæзынд. Сæвæрдтой йæ ивгъуыд æнусы 90-æм азты. Фæлæ рæстæгимæ фæзынд цавæрдæр лыггæнинаг фарстатæ. Бынæттон администраци йæм базилынæй зæрдæ бавæрдтой. Уыналы мемориалмæ дæр цæуы бæстон цæстдард. Йæ алыварс бырæттæ бафснайдтой, кæрдæг ныккарстой. Къæйдурыл ма сног кæндзысты хæстонты нæмттæ, æмæ Уæлахизы бæрæгбонмæ цæттæ.
Æппæтуæрæсеон адæмон фронты уæнгты ныхæстæм гæсгæ, районы æппæт хъæуты администрациты разамонджытæ хæстæгдæр рæстæг саив кæнын кæндзысты хæстонты æппæт цыртдзæвæнтæ.
Æхсæнадон кусджытæ сæхæдæг дæр цæттæ сты хъæутæн баххуыс кæнынмæ. Адæмон фронты волонтертæ 9-æм маймæ фæнд кæнынц хæхтæм ацæуын, æмæ номарæн бынæттæм базилын.
