Ныртæккæйы уавæрты коронавирус парахат кæнын ма бауадзыныл зæрдиаг фæллой кæнынц медицинон кусджытæ. Бирæтæ, сæхиуыл нæ ауæрдгæйæ, кусынмæ бацыдысты республикæйы клиникон æмæ тагъд æххуысы клиникон рынчындæтты «чъизи зонæ» кæй хонынц, уырдæм. Уыдонæй иу у Комсомольскæйы хъæуы цæрæг, медицинон хо Дзæгъиаты Джульеттæ. Куыд иннæтæм, афтæ Джульеттæмæ дæр тынг æнхъæлмæ кæсынц сæхимæ.
Комсомольскæйы хъæуы цæрæг, медицинон хо Дзæгъиаты Джульеттæ ныртæккæ йæ хиуæттимæ æрмæстдæр телефонæй фæдзуры. Сылгоймаг барвæндонæй кусынмæ бацыди республикæйы клиникон рынчындонмæ, чъизи зонæ кæй хонынц, уырдæм. Уымæн æмæ æххуыс тынгдæр кæм хъæуы, уым уæвын у цыфæнды медицинон кусæджы сæйрагдæр хæс.
Джульеттæ раздæр куыста Кировы районы центрон рынчындоны. Ныртæккæ та дзы карантины тыххæй пациентты нæ исынц. Къæридортæ сты афтид. Уымæ гæсгæ медицинон хо рахаста уынаффæ, вирусы ныхмæ кæм тох кæнынц, уырдæм ацæуыны тыххæй. Йæ куысты бынаты отпуск райсгæйæ, фæллой кæнынмæ бацыд республикæйы клиникон рынчындонмæ.
Кæд дын де нæниздзинад ахæм фадат дæтты, уæд хъуамæ кусай, зæгъы Джульеттæ йæ уынаффæйы тыххæй. 1985-æм азы равзæрста ацы дæсныйад, æмæ йæ сæрбæрзондæй хæссы ныры онг.
Медицинон кусджыты æрвылбоны фæллой чъизи зонæйы абарæн ис хæстон тохимæ. Алы бон дæр сæ хизын хъæуы ног цæлхдурты сæрты. Уыимæ ам дæр ис бархионтæ.
Куыд иннæ медиктæм, афтæ Дзæгъиаты Джульеттæмæ дæр тынг æнхъæлмæ кæсынц йæ хиуæттæ сæхимæ. Сæ зæрдæ дарынц, хæстæгдæр рæстæг дохтыртæн ацы низыл фæтых уæвын кæй бантысдзæн, ууыл.
