Цæгат Ирыстонæй æдæппæтæй 4 мин адæймаджы систы регионалон къæпхæны уæлахиздзаутæ
Æппæтуæрæсеон конкурс «Уæлахиздзауты фæдонты» бацархайдтой нæ республикæйы минæвæрттæ дæр. Цæгат Ирыстонæй æдæппæтæй 4 мин адæймаджы систы регионалон къæпхæны уæлахиздзаутæ. Фæсивæдмæ цымыдисаг фæкаст сæ кадджын хистæрты, хъæбатыр хæстонты тыххæй радзурын. Уыцы хъæппæрис хорзыл банымадтой, æмæ сын зæрдиаг æххуыс кодтой сæ ныййарджытæ æмæ ахуыргæнджытæ дæр..
«Уæлахиздзауты фæдонты» конкурсы нæ бæстæйы архайдтой 16 мин адæймаджы. Цæгат Ирыстонæй та 4 мины систы регионалон къæпхæны уæлахиздзаутæ. Йе хсидгæ саламы писмо Анатолий Вирясовы мады фыды фыд Федор Гончаров рарвыста 1944-æм азы райдиан. Хæсты хъæбатырыл нал сæмбæлд Анатолийы мад Еленæ. Конкурсы руаджы та лæппу базыдта бирæ цымыдисаг хабæрттæ. Зæгъæм, йæ кадджын хистæр хæсты тыххæй дзурын кæ нæ уарзта, уый. Лæппуйæн йе стырдæр бæллиц у æфсæддон суæвын.
Ацы куыст Анатолий бацæттæ кодта йæ ахуыргæнæгимæ. Фæлæ сæ дыууæйы хъуыды дæр у иу – сæйрагдæр у сабыр дунейы цæрын.
Сæдæгай мин бинонты истори æнгом баст у нæ бæстæйы историимæ. Дзæуджыхъæуы 38-æм скъолайы 10-æм къласы ахуырдзау Хъалаты Давид у Намысы 3 ордены æххæст кавалер Хъалаты Семены фæдон. Бæлвырддæр та – йæ цыппæрæм фæлтæры минæвар. Сæ кадджын хистæрмæ ма ис Фыдыбæстæйы Стыр хæсты фыццæгæм æмæ дыккæгæм къæпхæнты ордентæ, Хъæбатырдзинады, хæстон сгуыхтдзинæдты æмæ Германийыл фæуæлахиз уæвыны тыххæй майдантæ, стæй ма дæсгай хицауадон хæрзиуæджы. Абон кадджын хæстоны кæстæр архайы конкурс «Уæлахиздзауты фæдонты»». Йæ куыстæн райста 100 баллы.
Давиды мад у ирон æвзаджы ахуыргæнæг. Куыд радзырдта, афтæмæй сæ мыггаджы кадджын хистæрты никуы рох кæнынц.
Хъалатæ сæ ныфсхаст хæстоны тыххæй ныффыстой æмдзæвгæ.
Зæгъын ма хъæуы уый, æмæ, цæмæй конкурсы алы архайæгæн дæр æмбæлгæ аргъ скæной, уый тыххæй сын снысан кодтой нымæцон код. Хъалаты Давиды æмæ Анатолий Вирясовæй дарддæр ма конкурсы архайдтой регионалон къæпхæны уæлахиздзаутæ Хæбæлаты Владæ æмæ Бокоты Алыксандр. Се ппæт дæр иумæ бакодтой, абарæн кæмæн нæй, ахæм ахсджиаг патриотон куыст.
