Сæ нысан у – зын рæстæг се мкусджытæн баххуыс кæнын
Мæскуыйæ сæрмагонд рейсæй Цæгат Ирыстонмæ стахти дохтырты бригад. Сæ нысан у – зын рæстæг се мкусджытæн баххуыс кæнын. Уыимæ, семæ сластой медицинон кусæнгæрзтæ æмæ хостæ. Сæрвитдзысты ма, рæуджытæ чи кусын кæны, ахæм аппараттæ, стæй вирусы ныхмæ буаргъæдты экспресс-тестытæ дæр. Знон уал ссыди 6 специалисты, фæлæ ма сыл бафтдзæн. Нысантæм гæсгæ æдæппæтæй хъуамæ уой 40 адæймаджы. Ахæм æххуыс райсдзысты, Цæгат Кавказы ныртæккæ фæкæсынхъуаг чи у, уыцы регионтæ се ппæт дæр.
Цæгат Ирыстонмæ Мæскуыйæ стахти дохтырты къорд. Хæдтæхæг Беслæны æрбади æнафон. Бæстæйы сæйраг горæты дохтыртæ ссыдысты сæ цæгатирыстойнаг æмкусджытæн æххуыс кæнынмæ. Се ппæтмæ дæр ис коронавирусы инфекцийы ныхмæ тох кæныны фæлтæрддзинад.
Республикæмæ ссыди медицинæйы алы къабæзты 6 специалисты. Се хсæн реаниматолог, инфекционист, компьютерон томографи чи кæны, ахæм специалистæмæ пульмонолог. Куыд нысан кæнынц, афтæмæй регионы фæуыдзысты дыууæ къуыримæ хæстæг. Сæ бон у æмæ бафæстиат уыдзысты фылдæр рæстæг дæр. Уый аразгæ у республикæйы эпидемион уавæрæй.
Абон райсомæй Мæскуыйаг дохтыртæ фембæлдысты республикæйы æнæниздзинадхъахъхъæнынады министрады минæвæрттимæ. Сфидар кодтой хæстæгдæр дыууæ къуыримæ куысты пълан. Нысангонд æрцыдысты, уазæг дохтыртæ цы медицинон куыстуæттæм æрвыст æрцæудзысты, уыдон.
Цæгат Ирыстоны паддзахадон медицинон академийы клиникæ у фыццаг, федералон специалисттæ кæй бабæрæг кодтой, уыдонæй. Аргъ скодтой куыстуаты уавæрæн. Хæстæгдæр рæстæг ам райдайдзысты коронавирусæй рынчынты исын. Нырма уал дзы равæрдтой 100 сынтæджы, уыдонæй 6 сты реанимационтæ. Мæскуыйаг дохтыртæ куыд зæгъынц, афтæмæй ам æппæт хъуыддæгтыл дæр бакуыстой лæмбынæг. Фылдæр дзы исдзысты сæ уавæр æрдæг уæззау кæмæн уа, ахæм рынчынты.
Клиникæ ифтонг у рæуджытæ кусынгæнæн аппараттæй дæр. Æнхъæлмæ ма кæсынц ноджыдæр иу партимæ. Нырма уал территорийы пациенттæ нæй.
Федералон дохтыртæ ныридæгæн райдыдтой се мкусджытæн консультацитæ кæнын. Сæ хæс у, рынчынты дзæбæх кæныны хъуыддаджы регион рæдыдтытæй бахизын. Ахæм хъуыддæгтæ Мæскуыйы дæр уыди, фæлæ дохтырты фæлтæрддзинадимæ уавæр сраст.
Уыцы хæдтæхæг ма Цæгат Ирыстонмæ сласта гуманитарон æххуыс дæр. Коронавирусимæ тох кæнынæн препараттæ, 55 милуан сомæн. Дохтыртæн сластой хи хъахъхъæнæн фæрæзтæ дæр. Знон уал медикаменттæ райста тагъд æххуысы клиникон рынчындон.
