Байхъуыстой дзы республикæйы рынчындæтты æмæ поликлиникæты сæйраг дохтырты докладтæм
Оперативон штабы радон æмбырдæн разамынд лæвæрдта Битарты Вячеслав. Арæзт уыд видеоконференцийы хуызы. Байхъуыстой дзы республикæйы рынчындæтты æмæ поликлиникæты сæйраг дохтырты докладтæм. Стыр æргом аздæхтой хостæй æмæ хи хъахъхъæнæн фæрæзтæй ифтонгдзинадмæ.
Цæгат Ирыстоны медицинон организацитæ, куыд æмбæлы, афтæ æххæст кæнынц Уæрæсейы æнæниздзинадхъахъхъæнынады министрады амынддзинæдтæ. Фыццаджыдæр ам ныхас цæуы æмбæлгæ кусæнгæрзтыл, кусджыты цæттæдзинадыл пациентты исынмæ, стæй иннæ асхджиаг хъуыддæгтыл. Битарты Вячеслав сæйраг дохтыртимæ æрдзырдта рынчындæтты уæлæмхасæн бынæттæ скæныныл, хъæугæ кусæнгæрзтæ æмæ хъахъхъæнæн фæрæзтæ самал кæныныл.
Республикæйы клиникон рынчындоны сæйраг дохтыр Митциты Астан куыд фехъусын кодта, афтæмæй ма сæм фæзынд 40 уæлæмхасæн бынаты, коронавирусæй рынчынты дзæбæх кæнынæн. Цæгат Ирыстоны сæргълæууæг бадомдта, цæмæй бæстондæр цæстдард цæуа, сæхи хæдзары чи дзæбæх кæны, уыцы адæммæ.
