Дæнцæгæн æрхæсдзыстæм республикæйы клиникон рынчындоны цæфтæ дзæбæхгæнæн хайады сæргълæууæг Плиты Мараты æмæ йæ командæйы дохтырты
Уæвгæ, дохтырты хсæн ис ахæмтæ дæр, æмæ коронавирусы ныхмæ тох кæныны рæстæг йæ квалификаци чи аивта. Дæнцæгæн æрхæсдзыстæм республикæйы клиникон рынчындоны цæфтæ дзæбæхгæнæн хайады сæргълæууæг Плиты Мараты æмæ йæ командæйы дохтырты. Травматологтæ цыбыр æмгъуыдмæ базыдтой инфекционисты дæсныйады сусæгдзинæдтæ..
Чысыл æмбырд æмкусджытимæ. Медиктæ æрныхас кодтой ахсджиагдæр хъуыддæгтыл, æмæ та ногæй бавнæлдтой сæ хæстæ æххæст кæнынмæ. Плиты Мараты командæйы уæнгты сæ бахъуыди аивын. Уымæн æмæ сæ хайады дыууын бынаты раивтой инфекцион хайады цыппор бынатмæ.
Плиты Марат республикæйы клиникон рынчындоны кусы 10 азы онг. Йæ хæстæ æххæст кæнынмæ йын æмбал нæй, зæгъынц йе мкусджытæ. Дохтыры дæсныйад ын хуыцауæй лæвæрд у. Абон кæд хайады сæргълæууæгæй кусы, уæддæр йæ профессионалон хæс æххæст кæны уæлдайджынтæй. Йæ бинонты ныр цалдæр мæйы нæ федта. Кусы æхсæвæй бонæй. Уæвгæ, ныртæккæ ахæм фæткы фæллой кæнынц йæ хайады æппæт специалисттæ дæр. Раздæр ацы хайады кусджытæ æххуыс кодтой, уæззау фыдбылызты чи бахауд, ахæм пациенттæн. Ныр та дзæбæх кæнынц, коронавирусы инфекцийæ рынчынты. Иу дохтыр дæр йæ дæсныйадыл йæ зæрдæ нæ ивы, кæд æмæ цалдæрыл ацы низ бахæцыд, уæддæр.
Дохтыртæ алы бон дæр æвдисынц уды фидардзинад æмæ хъæбатырдзинад. Фæллад уадзынæн сын рæстæг нæй. Республикæйы клиникон рынчындон мæйы размæ сси иунæг инфекцион госпиталь. Æппæт дохтыртæ цæттæгæнæн курсытæ ацыдысты медицинон ахуырады сайты, стæй Цæгат Ирыстоны медицинон академийы.
Плиты Мараты æмæ Кокойты Гитæйы хуызæн адæм сты дæнцæгæн хæссинаг. Алыхуызон зындзинæдты сæрты ахизгæйæ дæр æххæст кæнынц сæ профессионалон хæс, æмæ се ххуысы хай хæссынц рынчынтæн. Иу ныхасæй – ирвæзын кæнынц адæймаджы цард. Ахæм ныфсхаст профессионалты ныхмæ цыфæнды вирус дæр нæ фæлæудзæн.
