Ирыстон цæмæй ма рох кæной, уый тыххæй сывæллæтты сфæлдыстады республикон Галуаны хъомылгæнинæгтæ медиктæн балæвар кодтой сæ нывтæ
Ирыстойнаг дохтыртæн баххуыс кæныны тыххæй дыууæ къуырийы размæ цы специалистты къорд ссыди нæ республикæмæ, уыдон абон фæстæмæ ацыдысты Мæскуымæ. Ирыстон цæмæй ма рох кæной, уый тыххæй сывæллæтты сфæлдыстады республикон Галуаны хъомылгæнинæгтæ медиктæн балæвар кодтой сæ нывтæ. Мæскуыйы хуыздæр клиникæты 6 фæлтæрдджын специалисты Цæгат Ирыстонмæ ссыдысты майы кæрон, нæ бæстæйы президент Владимир Путины бардзырдмæ гæсгæ.
Медиктæ базонгæ сты нæ республикæйы медицинон куыстуæтты архайдимæ. Бæлвырддæр та дзы коронавирусæй рынчынты куыд дзæбæх кæнынц, уыимæ. Се мкусджытæн радзырдтой сæ фæлтæрддзинады тыххæй. Уымæй дарддæр хорзыл банымадтой цæгатирыстойнаг дохтырты фæлтæрддзинад дæр. Сæ иумæйаг куыст цæудзæн дарддæр. Знон Дзæуджыхъæумæ ссыди мæскуыйаг дохтырты дыккаг десант.
