Стыр æргом æм аздæхтой Æрыдоны аграрон технологон колледжы
Кæд хистæр кары уæвгæйæ машинæ тæрын базонæн ис, уæд ма пенсийы ацæуыны агъоммæ кары ис ног дæсныйад райсын дæр. Уый тыххæй нæ республикæйы æххæст кæнынц проект «50-йæ» уæлæмæ. Стыр æргом æм аздæхтой Æрыдоны аграрон технологон колледжы.
Кокойты Анатолийыл цæуы 60 азы, æмæ ныр сфæнд кодта йæ дæсныйад аивын. Бæлвырддæр та дыккаг дæсныйад райсын. Йæхи ныффыста хъæды куыстгæнæджы курсытæм. Теоретикон ахуыртæ райдыдтой февралы. Афтæмæй цалдæр мæймæ фæндаггон кусæг сси хъæды куыстгæнæг. Ныртæккæ та Анатолийæн æрцыд фæлварæн дæттыны бон.
Кусæг дæсныйæдтæ ныртæккæ тынг хъæугæ сты, суанг пенсийы ацæуыны агъоммæ кары чи ис, уыцы адæмы хсæн дæр. Цæгат Кавказы аграрон-техникон колледжы бындурыл адæмы ахуыр кæнынц 12 дæсныйадыл. Веб-дизайнер, хъæды куыстгæнæг, механик, дзулфыцæг æмæ æндæртæ.
Сæрмагонд къордты ахуыртæ кодтой Æрыдон колледжы мастертæ æмæ педагогтæ. Курсытæ фесты иумæйаг демонстрацион фæлварæнæй. Арæзт æрцыд WorldSkilss-ы стандарттæм гæсгæ.
Пандемияйы аххосæй проект «50+»-ы архайджытæ рацыдысты ахуырады дистанцион хуызмæ. Фæлæ фæлварæнтæ та лæвæрдтой традицион æгъдаумæ гæсгæ. Уыимæ æххæст кодтой æнæмæнг хъæугæ æппæт профилактикон мадзæлттæ.
Курсытæ ацæуыны фæстæ алкæмæн дæр лæвæрд цæуы ног кусæг дæсныйады тыххæй æвдисæндар.
