Тускъаты Таймуразы хъуыдымæ гæсгæ, нацпроект у нæ республикæйы, стæй Уæрæсейы, æмтгæй райсгæйæ, социалон-экономикон рæзты ахсджиагдæр фæрæз
Национ проект «Демографи» æххæст кæныны къæпхæнтыл ныхас цыд, Тускъаты Таймуразы разамындæй арæзт видеоконференцийы. Премьеры хъуыдымæ гæсгæ, нацпроект у нæ республикæйы, стæй Уæрæсейы, æмтгæй райсгæйæ, социалон-экономикон рæзты ахсджиагдæр фæрæз.
Бæстон доклад скодта æнæниздзинадхъахъхъæнынады министр Годжысаты Тамерлан. Куыд фехъусын кодта, афтæмæй 2019-æм азы Цæгат Ирыстоны бакодтой стыр профилактикон куыст. Ацы азы кæронмæ ма нысан кæнынц дыууæ районы муниципалон программæтæ сæххæст кæнын.
Тускъаты Таймураз загъта, ахсджиаг кæй у æппынæдзухдæр адæмы ргом профилактикон мадзæлттæм здахын. Зынгæ æвæрæн æм хæссынц волонтертæ-медиктæ. Фæллойы æмæ социалон рæзты министр Хуыбаты Барис та радзырдта, федералон бюджетæй алы мæй дæр цы фиддонтæ цæуынц, уыдоны тыххæй. Уымæй дарддæр æххæстгонд цæуы проект «Хистæр кары адæм». Уый дæр ис нацпроект «Демографи»-йы хыгъды.
Иннæ ахсджиаг хъуыддаг баст у сылгоймæгтæн куыст дæттынимæ. 2019-æм азы рæвдауæндæтты арæзт æрцыд 1315 бынаты. Ацы аз дæр ахæм куыст цæуы. Уыцы-иу рæстæг сылгоймæгтæн арæзт цæуынц фæлтæрддзинад фылдæргæнæн курсытæ, загъта куыст дæттыны комитеты сæрдар Платы Альбинæ. Национ проект ма фылдæр адæмæн фадат дæтты физкультурæ æмæ спортæй архайынæн дæр. Афтæ радзырдта министр Хуыгаты Алан.
Фарон бантыст 4 спортивон фæзы саразын Алагиры, Æрыдоны, Цыколайы æмæ Октябрьскæйы, стæй физкультурон-дзæбæхгæнæн комплекс Мызуры. Уымæй дарддæр 13 милуан сомæй фылдæр радих кæндзысты сывæллæтты спортивон скъолайы «Спартак-Алани»-йæн футболон фæз саразынæн.
