Йæ сæйраг нысан у – ахуыргæнджыты ргом хъæуккаг скъолатæм раздахын
Афæдзы райдианæй нæ республикæйы æххæстгонд цæуы федералон программæ «Земский учитель». Йæ сæйраг нысан у – ахуыргæнджыты ргом хъæуккаг скъолатæм раздахын. Программæйы домæнтæм гæсгæ, педагог районы скъолайы 5 азы куы бакуса, уæд райсдзæн1 милуан сомы..
Алина Филонова кусы англисаг æвзаджы ахуыргæнæгæй Дзæуджыхъæуы цыппор дыккæгæм скъолайы. Ивгъуыд азы ноябры сфæнд кодта федералон программæ «Земский учитель»-ы архайынмæ курдиат бадæттын. Ацыди конкурсы æртæ къæпхæны, æмæ иннæ аз райдайдзæн Архонкæйы дыккæгæм скъолайы кусын.
Цæрæнуаты фарста Алинæмæ нæ хауы, кæм цæра станицæйы, уый йын ис. Программæмæ гæсгæ цы æхца райсдзæн, уыдон та схардз кæндзæн йæ сывæллæтты ахуырадыл.
Архонкæйы скъолайы англисаг æвзаджы ахуыргæнæг рагæй хъуыди. Уымæ гæсгæ скъолайы разамынд курдиат арвыста, ацы программæйы архайыны тыххæй. Уымæн та хъуыди сайтмæ æппæт хабæрттæ бахæссын.
Программæ «Земский учитель» Уæрæсейы æххæст кæнынц фыццаг хатт. Йæ тыхы бацыд дæсæм январы. Цæгат Ирыстонæй дзы архайдта æхсæрдæс педагогы. Уыдон хъуамæ хъæуккаг скъолаты бакусой æппын къаддæр фондз азы. Æхцайы фæрæзтæ – милуан сомы схардз кæндзысты, сæхи куыд бафæнда, афтæ. Цæгат Ирыстоны фыст æрцыд бадзырд, цæмæй ма ацы программæйы архайд цæуа дыууæ мины дыууын дыккæгæм азмæ. Иннæ аз программæйы фæрцы фæнд кæнынц цыппæрдæс куысты бынаты баххæст кæнын.
