Йæ архайджытæ æрныхас кодтой регионы оперативон уавæрыл, низ къаддæр кæй кæны, рынчындæтты æмæ поликлиникæты куыстыл
Республикæйы коронавирус ма парахат кæныны фарстаты фæдыл, Битарты Вячеславы разамындæй дистанцион хуызы арæзт æцыди Оперативон штабы æмбырд. Йæ архайджытæ æрныхас кодтой регионы оперативон уавæрыл, низ къаддæр кæй кæны, рынчындæтты æмæ поликлиникæты куыстыл.
Хицæн ныхасы аккаг уыди, рынчындæттæ хæринагæй ифтонг кæныны фарста. Республикæйы Сæргълæууæг йе ргом аздæхта, хæринаг чи ласы рынчындæттæм, уыцы сæрмагонд куыстуат хъуамæ дзуапп дæтта æппæт домæнтæн. Сæйраг нысан – цæмæй рынчынтæ исой хæрзхъæд хæринаг. Ацы хъуыддаджы хъуамæ къуылымпыдзинæдтæ ма уа, уымæн æмæ рынчынтæ сдзæбæх кæныны фарстайы бирæ аразгæ у, цы хæрынц, уымæй дæр, загъта Битарты Вячеслав.
Æмбырды куыд фехъусын кодтой, афтæмæй абон специалисттæ сæ цæстд дарынц республикæйы эпидемиологон уавæрмæ. Сæвзæрд уавæр цы фæтк расайдта йæ фæдыл, уый фæстаг бонты фæлæмæгъдæр æмæ æхсæнады хидарыны фæтк дæр гыццыл аивта. Фæлæ уæддæр нырма уавæр у карз, æмæ йæм куыдфæндыйы цæстæй кæсæн нæй. Уæ зæрдыл уын æй лæууын кæнæм, 15-æм июнæй фæстæмæ республикæйы изоляцийы фæтк фæлæмæгъдæр. Уыимæ, дарддæр æххæст кæнын хъæуы æдасдзинады домæнтæ.
