Наркотиктæй æмæ, зондахастыл æвзæрырдæм чи ахады, ахæм препараттæй æнæ дохтырты амындмæ гæсгæ чи пайда кæны, уыцы адæмы дзабæхгæнæн мадзæлттæм хъуамæ уа карздæр цæстдард. Ууыл ныхас цыди наркотикты ныхмæ къамисы æмбырды. Амыдта йæ республикæйы Сæргълæууæг Битарты Вячеслав.
Ныртæккæйы закъонмæ гæсгæ, тæрхондонæн фадат ис, ацы къорды адæмæн профилактикон, медицинон æмæ реабилитацион лæггæдтæ кæнынæн. Стæй, процедурæтæ æххæст кæнын чи нæ кома, уыдоны та административон æгъдауæй æфхæрынæн. Битарты Вячеслав йе ргом аздæхта фарстамæ бæрнон цæстæй рæкæсын, уымæн æмæ ацы категорийы адæм сты тæссагдæр къорды.
Республикæйы сæргълæууæг бадомдта, дзуапдæттæг ведомствæты хсæн æмгуыстады фæткмæ ногæй æркæсын. Ахуырады æмæ наукæйы министр Людмила Башарина йæ раныхасы радзырдта, 13 азæй 18 азы онг кæуыл цæуы, ахæм сывæллæттæ наркотиктæй пайда кæнынц æви нæ, уый тыххæй социалон-психологон тестытæ æмæ медицинон æркасты бæрæггæнæнты тыххæй.
Медицинон-профилактикон æркасты фæрцы Дзæуджыхъæуы ахуыргæнæндæтты рабæрæг кодтой 13 адæймаджы. Министр загъта, уыцы æнæхъом сывæллæттæн бацæттæ кодтой сæрмагонд хъомыладон пълан. Ахæм куыст цæудзæни ног ахуыры азы дæр.
