Бæрæг кодтой Октябрьскæйы базарадон объекттæ
Уæрæсейы фæлхасадмæ цæстдарды цæгатирыстойнаг Управленийы кусджытæ æмæ Горæтгæрон районы администрацийы минæвæрттæ рацыдысты иумæйаг рейды, æмæ бæрæг кодтой Октябрьскæйы базарадон объекттæ.
Бæрæггæнæн куыст цыди бынæттон дуканиты. Стыр æргом аздæхтой, хойрæгтæ кæм уæй кæнынц, уыцы объекттæм. Дуканиты кусджытæ, куыд æмбæлы, афтæ æххæст кæнынц æдасдзинады домæнтæ. Бæлвырддæр та – дарынц хи хъахъхъæнæн фæрæзтæ, маскæтæ æмæ æрмкъухтæ. Уымæй дарддæр алы 3 сахаты бæстыхайы бакæнынц дезинфекцион куыст. Тæрхæджытæ æмæ дуæрттæ бапырх кæнынц сæрмагонд таддагæй.
Уæдæ фæлхасгæнджытæн дæр байуарынц маскæтæ, стæй сын сæ зæрдыл æрлæууын кæнынц, цæмæй æххæст кæной социалон дистанци. Дуканиты дуæрттыл бакодтой зæрдылдарæн хъусынгæнинæгтæ, хи куыд дарын хъæуы, уый тыххæй. Æнæмæнг хъæугæ товарты æргътæм дæр цæуы бæстон цæстдард.