Ног закъон йæ тыхы кæдæй бацыд, уæдæй фæстæмæ хъалонисæн службæмæ балæвæрдтой бирæ курдиæттæ
1-æм июлæй фæстæмæ Уæрæсейы æппæт регионтæн фадат фæзынд хъалонты сæрмагонд фæтк сфидар кæнынæн. Хауы, йæхи хъомысæй чи кусы, уыцы амалхъом адæммæ. Ахæм хъæппæрис фехъусын кодта президент Владимир Путин нæ бæстæйы цæрджытæм сидты. Экспертты хъуыдымæ гæсгæ, ногдзинады фæрцы фæкъаддæр уыдзæн, фæсаууонмæ чи кусы, уыдоны, стæй æгуыст адæмы нымæц дæр. Уыимæ ма официалон æгъдауæй чи фæллой кæна, уыцы адæмыл фæбæрæг уыдзысты хуыздæрырдæм ивддзинæдтæ. Цавæртæ, уый тыххæй радзурдзыстæм нæ дарддæры æрмæджы.
Темырхъанты Зæринæ кусы PR-стратегитыл, стæй социалон медиакъабазы нырыккон технологитыл. Зæгъæн ис, æмæ социалон хызты æмæ блогты руаджы аудиторийы ргом здахы алыхуызон сайттæм. Уыцы-иу рæстæг цалдæр клиентæн лæггад кæнын ын баххуыс кодта йæхиуыл куыст. Уыимæ – закъоны бындурыл. Ныртæккæ та цалдæр боны Зæринæ у, самозанятость кæй хонынц, ахæм кусæг. Уыцы статус æрыгон чызг райста, системæйы йæх куы срегистраци кодта, уæд. Уый тыххæй та йæ цæуын никæдæм бахъуыди. Ахæм фадат ис онлайн бастдзинады фæрцы. Хъæуынц æрмæстдæр телефон æмæ паспорт.
Зæринæйы хъуыдымæ гæсгæ 4% хъалон афтæ тынг нæ банкъардзынæ. Уыимæ ма ис цалдæр уæлæмхасæн æхсызгондзинады. Бæлвырддæр та райсæн ис паддзахадон æххуыс, æмæ кредит. Профессионалон æфтиагыл хъалон фадат ратдзæн Цæгат Ирыстоны 5 мин цæрæгæн закъоны бындурыл кусынæн. Уыдон канд хибарæй кусджытæ не сты, фæлæ ма цалцæггæнджытæ, шофыртæ, аивгæнæн лæггæдтæ хæдзары чи кæны, ахæм специалисттæ, æмæ æндæр категориты граждæнтæ. Ома алыхуызон лæггæдты куыстгæнджытæ, æмæ йæхи товартæ чи аразы, ахæм адæм. Уымæй дарддæр паддзахады рдыгæй хъахъхъæд цæуынц сæ клиенттæ дæр.
Ацы куысты ног фæтк фадат ратдзæн, фæсаууонмæ чи кусы, уыдоны закъоны бындурмæ ракæнынæн. Уымæй дарддæр иуæй-иу амалхъом адæмæн сæ бон уыдзæн сæ хъалонтæ фæкъаддæр кæнын. Кæд йæ архайды æххуырсгæйæ ничи кусы, æмæ йе фтиаг афæдзмæ 2 милуаны æмæ 400 мин сомæй фылдæр кæд нæу, уæд. Уæдæ сæ нæ бахъæудзæн бухгалтерон дзуапп дæттын дæр. Æппæт домæнтимæ базонгæ уæвгæйæ, Темырхъанты Зæринæ бамбæрста, ацы куысты фæтк ын зæрдæмæдзæугæ кæй у, уый.
Ног закъон йæ тыхы кæдæй бацыд, уæдæй фæстæмæ хъалонисæн службæмæ балæвæрдтой бирæ курдиæттæ. Цалдæр бонмæ льготæты фæткæй спайда кодтой мин адæймагæй фылдæр.
