Маскæтæ æмæ æрмкъухтæ хъуамæ дарой куыд уæйгæнджытæ, афтæ фæлхасгæнджытæ дæр
Уæрæсейы фæлхасадон цæдисы уæнгтæ радон хатт сбæрæг кодтой, базарадон бынæтты коронавирус парахат кæныны ныхмæ мадзæлттæ куыд æххæст кæнынц, уый. Маскæтæ æмæ æрмкъухтæ хъуамæ дарой куыд уæйгæнджытæ, афтæ фæлхасгæнджытæ дæр. Уæйгæнæн бынат та æппынæдзух дезинфекци кæнын, стæй сæрмагонд журналы бæрæг кæнын буары тæвд. Социалон дæрддзæфдзинад æххæст кæнынæн алы дуканийы хъуамæ уа сырх хах. Уыцы домæнтæ æххæстгонд куы нæ цæуой, уæд сæ куыст рæстæгмæ урæд æрцæудзæн. Доваторы проспекты базаргæнæндæттæ дзуапп дæттынц домæнтæн. Уæйгæнджытæ цæттæ сты æнæ маскæтæй сæм кæй цæуынц, уымæ дæр æмæ сæ бынат арæх кæнынц дезинфекци. Фæлæ уæддæр фæлхасадон цæдисы уæнгтæ рейды рæстæг сбæрæг кодтой, домæнтæ чи халы, уыдоны дæр. Ахæм кусджытæн уал скодтой дзырды уайдзæф, радон рейд та ацæудзæн къуырийы фæстæ.
