Фæлæ фæлладуадзæн кампани ныридæнæн нæма райдыдта
Сывæллæтты сæрдыгон-дзæбæхгæнæн кампанийы цы объекттæ архайынц, уыдон кæронмæ бæрæггонд фесты зынгсирвæзты ныхмæ домæнтæ куыд æххæстгонд æрцыдысты, уымæй. Фæлæ фæлладуадзæн кампани ныридæнæн нæма райдыдта. Уый тыххæй хатдзæг рахæсдзысты æрмæстдæр эпидемиологон уавæр нымайгæйæ. Кæд коронавирусы инфекци апарахатæй тæссаг нал уа, уæд лагертæ æмæ базæтæ сæ дуæрттæ байгом кæндзысты фæлладуадзджытæн. Цæгат Ирыстоны ис 147 объекты. Уыдонæй фарасты ис уавæртæ, цæмæй дзы сывæллæттæ æхсæвæй-бонæй уой, уый тыххæй. Аст лагеры разамонджытæ бахатыдысты æнæнхъæлæджы цауты министрадмæ, цæмæй сын сæ бæрны цы бæстыхæйттæ ис, уыдон сбæрæг кæной æдасдзинады домæнтæм гæсгæ. Ведомствойы специалисттæ федтой æппæт уавæртæ, бæлвырддæр та фæдисы дзæнгæрджытæ, эвакуацион ахизæнтæ, зынгхуыссынгæнæн фæрæзтæ, стæй зынгсирвæзты рæстæг спайда кæнæн кæмæй ис, уыцы хахнывтæ. Объекттæй æппæт домæнтæн дзуапп лæвæрдта æрмæстдæр лагерь «Звездочка». Иннæтæн та радтой æмгъуыд, цæмæй цы аиппдзинæдтæ сбæрæг кодтой, уыдон аиуварс кæной.
