Баиу кодта Уæрæсейы алы регионтæй фæсивæды
Фæсивæд сæ курдиат кæм раргом кæной, ахæм форумтæ кæнынц фылдæрæй-фылдæр. Æмæ уый у æхсызгон. Кæронмæ æрхæццæ Æппæтуæрæсеон фæсивæдон ахуырадон форум «Территория смыслов» «Вызовы образования»-йы 4-æм фæлтæр. Баиу кодта Уæрæсейы алы регионтæй фæсивæды. 200 Мастер-архайæджы, 600 нымæцон Аватары, стæй ма онлайн-архайджытæ дæр. Уыдонæн фадат уыдис лекцитæм цæуынæн, фæрстытæ дæттынæн. Уæдæ дзы уыдысты хибарæй архайджытæ дæр. Цыппæрæм фæлтæры ма архайдтой Уæрæсейы скъоладзауты змæлды разамонджытæ, педагогтæ, уæлдæр æмæ астæуккаг ахуыргæнæндæтты фæсивæдимæ чи кусы, ахæм специалисттæ, студентон советты æмæ профцæдисты, стæй студентон клубты æмæ медиа национ лигæйы минæвæрттæ. Ацы аз форумы программæйы цæуы фæсивæдон хъæппæристы грантты конкурс. Цалынмæ курдиæттæ истой, уæдмæ арæзт æрцыд 3 тематикон вебинары социалон проекттæ аразынæй æмæ адæмы цур раныхæстæй. Стыр æргом аздæхтой проектон курдиæтты консультацитæм. Æдæппæтæй балæвæрдтой 128 курдиаты. Уæлахиздзаутæ систы 30 адæймаджы нæ бæстæйы 25 субъектæй. Уыдонæн гранттæ радтой 14 милуаны 140 мин сомæй фылдæр.
