Канд ног æнкъарæнтæ райсынмæ нæ, фæлæ ма сæхи маршрут саразыны тыххæй
Уазæгуаты Ирыстонмæ. 12 æрыгон тревэл-блогеры Уæрæсейы алы регионтæй ссыдысты Дзæуджыхъæумæ. Канд ног æнкъарæнтæ райсынмæ нæ, фæлæ ма сæхи маршрут саразыны тыххæй. Уый хаст æрцæудзæн нæ республикæйы туризмы комитеты реестрмæ. Ацы хъуыддаг саразын бантыст, социалон проект «Уазаг тур»-ы архайыны фæрцы.
Туристон проект цæмæй фæрæстмæ уа, уый тыххæй æмбырд арæзт æрцыд Дзæуджыхъæуы администрацийы. Уæвгæ йын фыццаг хатт презентаци скодтой ивгъуыд азы фæззæджы. Уæд æй хорзыл банымадтой фæсивæдон хъæппæристы конкрусы. Проекты разамонæг Бзарты Еленæйы хъуыдымæ гæсгæ, сæйраг нысан у – нæ регионы туризмы рæзтыл кусын, æмæ йæм фæсивæды ргом здахын. Проекты архайджытæн бацæттæ кодтой цымыдисаг программæ.
Раздæр уал лæппутæ æмæ чызджытæ архайдтой æвзарæн конкурсы. Бацæттæ кодтой видеоæрмæджытæ сæ регионы тыххæй. Хуыздæр куыстыты авторты æрбахуыдтой Цæгат Ирыстонмæ. Се ппæт дæр фыццаг хатт сты нæ республикæйы. Нырæй фæстæмæ сæ алчидæр сæхи социалон хызты дзурдзæн æмæ æвдисдзæн, ам сы феной, æмæ сæ фылдæр дисы цы бафтыдта, уыдон.
