Хицауады Хæдзары йын фембæлд уыд республикæйы Сæргълæууæг Казбек Коковимæ
Цæгат Ирыстоны Сæргълæууæг Битарты Вячеслав бабæрæг кодта Кæсæг-Балхъары республикæ. Хицауады Хæдзары йын фембæлд уыд республикæйы Сæргълæууæг Казбек Коковимæ. Сæ ныхасы ма архайдтой Цæгат Ирыс тоны Парламенты Сæрдар Алексей Мачнев æмæ Премьер-министр Тускъаты Таймураз. Æрдзырдтой дыууæ республикæйы ахсджиаг фарстатыл – регионты хсæн æмгуыстадыл, социалон-экономикон рæзтыл, культурон æмархайдыл, иумæйаг проекттæ царды уадзыныл. Баст сты экологи æмæ туризмы къабазимæ. Кæсгæ-Балхъар у нæ хорз сыхаг æмæ стратегион æмкусæг. Бæттынц нæ рагон историон, экономикон, наукон æмæ культурон бастдзинæдтæ. Уырны нæ, фидæны уыцы бастдзинæдтæ фидардæр кæй кæндзысты, уый. Мах та архайдзыстæм, цæмæй нæ дыууæ адæмы ног фæлтæртæ æмгуыстады историмæ хæссой сæхи ирд сыфтæ, загъта Битарты Вячеслав. Казбек Коковимæ рахастой фæндон, Цæгат Ирыстоны æмæ Кæсæг-Балхъары хсæн цы дыууæвæрсыг æмгуыстады æмæ хæлардзинады бадзырд бафыстой, уый та ногæй царды рауадзыны тыххæй. Бадзырд фыст æрцыд 1995-æм азы. Документæн ног редакци скæнын нысан кæнынц Дзæуджыхъæуы. Уый уыдзæн Кæсæг-Балхъары делегацийы нæ республикæмæ официалон балцы рæстæг.
