Баст у Беслæны теракты амæттæгтимæ
Волгограды кусы хуызистыты равдыст «Помнить, чтобы жить». Баст у Беслæны теракты амæттæгтимæ. Равдыстмæ бахастой 100 къамæй фылдæр. Систа сæ агентад ТАССы уацхæссæг Сергей Узаков. Уый 2004-æм азы сентябры фыццаг 3 боны куыста Беслæны. Равдыст байгом кодта блок «ожидание». Уырдæм хауынц, скъола куы бацахстой, уыцы минутты ист хуызистытæ. Дыккаг хаймæ та хауынц штурмы рæстæг ист къамтæ. Уыдон сты æппæтæй зæрдæхалæн кадртæ. Кæй зæгъын æй хъæуы, фенæн дзы ис цæф æмæ мард адæмы. Экспозици æхгæны номарæн хай. Ис дзы цалдæр нывы дæр. Сныв сæ кодтой раздæры амынæты уæвджытæ. Волгограды æхсæнадон организаци «Хæлардзинады Хæдзары» хистæрты советы сæрдар Дауыраты Арсен куыд радзырдта, афтæмæй Фыдыбæстæйы Стыр хæсты рæстæг беслæйнæгтæй фæмард 357 адæймаджы. 2004-æм азы 3 боны цауты та, зæгъæн ис, æмæ уыйбæрц адæм бацарæфтыд цалдæр минутмæ. Волгоград у æртыккаг горæт, Цæгат Кавказы федералон зылдæй дарддæр ма ацы равдыст кæм федтой, ахæм. «Помнить, чтобы жить» федтой Черкесскы, Налцыччы æмæ Махачкалайы. Раздæр та йемæ базонгæ сты Мæскуыйы æмæ Санкт-Петербурджы цæрджытæ. «Беслæны мадæлты» комитеты сæрдар Дудиаты Сусаннæ куыд радзырдта, афтæмæй равдысты сæйраг нысан у – адæмы хъуыды кæныныл бафтауын, цы у царды ахсджиагдæр хъуыддаг. Дуне хъуамæ баиу уа терроризмы ныхмæ, цæмæй ахæм бæллæх макуыуал æрцæуа, уый тыххæй. Проект «Помнить, чтобы жить» арæзт æрцыд ассоциаци «Беслæны мадæлты» хъæппæрисæй. Баххуыс сын кодта президенты гранттæ дæттыны Фонд.
