Йæ нысан у ирон адæмы национ иудзинад фидар кæнын æмæ дзыллон информацион фæрæзты райрæзт
Дзæуджыхъæуы схорзæхджын кодтой æрвылазон конкурс «Мæ уарзон Ирыстон»-ы лауреатты. Йæ нысан у ирон адæмы национ иудзинад фидар кæнын æмæ дзыллон информацион фæрæзты райрæзт. Конкурс арæзт цæуы нæ республикæйы мыхуыры æмæ дзыллон коммуникациты комитеты хъæппæрисæй. 30 æрмæгæй кæй журналистон куыст нымад æрцыд хуыздæрыл уый тыххæй радзурдзæн Хъайтыхъты Фатимæ
Ирон аивадæн лæггадкæнынæй чи нæ фæллад, уыцы композитор Æлборты Феликсы уацмысæй райдыдта Республикæ Цæгат Ирыстоны хицауады æрвылазон преми «Мæ уарзон Ирыстон»-ы лауреатты хорзæх кæныны кадджын мадзал. Йæ архайджытæ уыдысты мадæлон æвзаджы бынтæй чи пайда кæны æмæ дзыллон информацион фæрæзты Ирыстоны цард чи æвдисы, уыцы журналисттæ.
Сфæлдыстадон конкурс расидт нæ республикæйы мыхуры æмæ дзыллон коммуникациты комитет. Балæвæрдтой сæм 30-куыстæй фылдæр мадæлон æвзагыл.
Конкурсон къамисы хатдзæгтæм гæсгæ сбæрæг сты 4 уæлахиздзауы. Мыхуыры къабазы лауреат ссис газет «Рæстдзинад»-ы редакторы хæдивæг Бутаты Эльзæ, интернет-рауагъдады къабазы та информацион портал «15 регион»-ы редактор Кучиты Алыксандр, стæй Кировы районы газет «Размæ»-йы сфæлдыстадон къорд. Телеуынадон æрмæджыты номинацийы уæлахиздзау ссис не мкусæг Моргуаты Ладæ
Лауреаттæн Дипломтæ æмæ хцайы премитæ, арфæйы ныхæстимæ радта республикæйы хицауады сæрдар Тускъаты Таймураз.
