Специалисттæ куыд зæгъынц, афтæмæй уыцы рæтты адæймагæн вæййы æппæтæй тæссагдæр фæрынчынуæвынæй
Коронавирус та скарз кæнын ма бауадзын. Уый тыххæй фæлхасадмæ цæстдарды управленийы æмæ мидхъуыддæгты министрады кусджытæ цæуынц рейдты, æмæ ма уæлдай хатт адæмы зæрдыл лæууын кæнынц, маскæтæ дарын кæй хъæуы, уый. Уæлдайдæр та æхсæнадон транспорты. Специалисттæ куыд зæгъынц, афтæмæй уыцы рæтты адæймагæн вæййы æппæтæй тæссагдæр фæрынчынуæвынæй.
Домæнтæ чи не ххæст кæны, уыдон тæссаг уавæры æвæрынц сæхи дæр, æмæ сæ алыварс адæмы дæр.
Хубаты Давид у 77-æм маршруты микроавстобусы шофыр. Кæройнаг æрлæууæнмæ куы бахæццæ вæййы, уæд сæрмагонд дезинфекцигæнæн фæрæзæй ныссæрфы йæ транспорт мидæгæй иууылдæр. Ахæм куыст æххæст кæнынц иннæ шофыртæ дæр. Æнæхъæн бон æххæст кæнынц æдасдзинады домæнтæ, æмæ сæ домынц бæлццæттæй дæр. Æнцон нæу, фæлæ æдасдзинад æппæтæй сæйрагдæр. Санитарон домæнтæ æххæст кæныны уавæр иумæйаг рейдты бæрæг кæнынц республикæйы мидхъуыддæгты æмæ промышленность æмæ транспорты министрадтæ, стæй фæлхасадмæ цæстдарды управлени.
Транспорты маскæйæ пайда кæныны домæн бæлццæттæ не ххæст кæнынц. Уый хыгъд, маршруткæ кæнæ автобусы фæрынчын уæвынæй у тынг тæссаг. Адæмимæ кæнынц профилактикон ныхас.Дзурынц сын æдасдзинады фæрæзтæй æнæмæнг кæй хъæуы пайда кæнын, уый.
Адæмæн сæ фылдæр хай фæткимæ разы сты. Æмæ цæттæ сты маскæтæ дарынмæ.
Ног ахуыры азæй æмæ фæлладуадзæн рæстæджы фæстæ æхсæнадон траспортæй чи пайда кæны, уыдоны нымæц зынгæ фæфылдæр. Уый та ууыл дзурæг у, æмæ хъæуы къæрцхъусдæр уæвын, зæгъынц специалисттæ. Зæгъæм, рейды рæстæг шофыры æнæ маскæйæ куы æрцахсой, уæд ын скæндзысты фиппаинаг, дыккаг хатт бафиддзæн ивар.
Дыууæ мæйы рейдты рæстæг, промышленность æмæ транспорты министрады цæстдарджытæ тæрхондæттæм арвыстой 60 административон хъуыддаджы.
