Ахуыргæнæндоны музейы фæзындысты ног экспонаттæ
Архонкæйы 1-æм скъолайы къулыл байгом Советон Цæдисы хъæбатыр Петр Масленниковы номарæн фæйнæг. Ахуыргæнæндоны музейы фæзындысты ног экспонаттæ. Петр Масленников райгуырд æмæ хъомыл кодта Архонкæйы. Йæ æвзонджы кары куы бацыд, уæд райдыдта Фыдыбæстæйы Стыр хæст. Йæ хæстон фæндаг райдыдта Дзæуджыхъæуы бынмæ æмæ фæцис Прагæйы.
Номарæн фæйнæг скъолайы къулыл у намыс æмæ хъæбатырдзинады æвдисæн. Петр Масленниковы æфсæддон хабæрттæ ам зоны алы саби дæр. Архонкæйаг лæппу фронтмæ ацыдис, æстдæс азы йыл нæма сæххæст, афтæмæй. Цыбыр рæстæгмæ йын саккаг кодтой Советон Цæдисы хъæбатыры ном.
Архонкæйы фыццæгæм скъолайы байгом ног музей. Уым равæрдтой Петр Масленниковы æфсæддон уæлæдарæс, йæ худ æмæ хæрзиуджытæ. Скъолайы разамынд, ахуырдзаутæ æмæ фыдыбæстæ хъахъхъæнджыты бинонты æхсæнады тыхтæй музейы ис æмбал кæмæн нæй, ахæм экспонаттæ æмæ стендтæ.
Кадджын мадзалы архайдтой Петр Масленниковы бинонтæ дæр.
Скъолайы музейы Петр Масленниковы дзаумæттимæ сты йæ фырты фырт Викторы дзаумæттæ дæр. Уый дарддæр ахаста йæ намысджын хистæры кад æмæ йæм Райгуырæн бæстæ куы фæсидтис, уæд æнæсдзургæйæ араст. Æфсæддон операцийы рæстæг Виктор йæ буарæй сæхгæдта рæмузæн æмæ аирвæзын кодта æнæхъæн отряд. Йæ мæлæты фæстæ йын саккаг кодтой Уæрæсейы хъæбатыры ном. Станицæйы цæрджытæ зонынц æмæ кад кæнынц сæ хъæбатыртæн. Уыцы кад мыггагмæ хæсдзысты фидæны фæлтæртæ дæр.
