Ацы фарста алыг кæныны тыххæй царды æххæстгонд цæуынц алыхуызон программæтæ
Пандемийæйы аххосæй бирæтæ æгуыстæй кæй баззадысты, уый фæзынди адæмы социалон уавæрыл. Ацы фарста алыг кæныны тыххæй царды æххæстгонд цæуынц алыхуызон программæтæ. Сæ иу – «Уæлæмхасæн мадзæлттæ». Йе ххуысæй Цыколайы хуыйæн фабрикæ йæ куыст иу бон дæр нæ баурæдта. Уый нæ, фæлæ ма дзы бирæтæ ссардтой рæстæгмæйы куыст дæр. Бæлвырддæр хабæрттæ радзурдзæн Гæджиты Сослан.
Хъаирты Артур карантины рæстæг баззади æнæ куыстæй. Пандемийæйы размæ та куыста арæзтады. Куыддæр объект радтой, афтæ нæлгоймаг æнæ *фтиагæй баззади. Ныртæккæ æппынæдзух куыст зын ссарæн у. Артуры хуызæттæ Æрæфы районы бирæ ис.
Ныртæккæ Артур кæны хъæддаг æхсæры куыст. «Фундук Алании»-йы хæдзарады ма уымæй уæлдай ноджыдæр фæллой кæны 36 адæймаджы. Ахæм фадат сын фæцис Республикæйы куыстдæттыны службæйы æмæ Цыколайы куыстуаты фæрцы. Тыллæг æмбырд кæнынц, зилынц бæлæстæм. Программæ «Уæлæмхасæн мадзæлттæ» æххæстгæнгæйæ бадзырд бафыстой æртæ мæйы æмгъуыдмæ.
Цыколайы хуыйæн фабрикæ йæ куыстæй нæ лæууы цалдæр азы. Сæрды та архæйдтой суткæйы дæргъы. Иууылдæр фæллой кæнынц медицинон маскæтæ æмæ хи хъахъхъæнæн уæлæдарæс хуыйыныл. Фæлæ пандемийæ ам дæр йæ фæд ныууагъта. 27 кусæгæн тæссаг уыди æгуыстæй баззайынæй. Цæмæй кусджыты нымæц раздæрау баззайа, уый тыххæй фæкъаддæр кодтой кусгæ бон. Фабрикæйы разамынд сфæнд кодта, программæ «Уæлæмхасæн мадзæлтты» архайын.
Рæстæгмæйы куыстыты чи фæллой кæны, уыдон се ппæт дæр райсдзысты, куыстдæттæг йæхæдæг кæй снысан кæна, ахæм мызд. Алцыдæр аразгæ у, кусгæ бон цас уа, уымæй. Программæйы фæрцы, афæдзы кæронмæ адæмæн сæ куысты бынæттæ бахъахъхъæдтой. Бирæтæн сезоны куыст ахъаз фæци сæ бинонты финансон къуылымпыдзинæдтæ аиуварс кæнынæн.
