Мидхъуыддæгты министрады сæргълæууæг, пъæлицæйы инæлар-лейтенант Михаил Скоков йе мкусджытимæ Дзæуджыхъæуы Намысы Аллеяйы сæвæрдта дидинджытæ æнусон арты цур
Мидхъуыддæгты оргæнты кусæджы боны агъоммæ та Цæгат Ирыстоны æрымысыдысты, йæ профессионалон хæс æххæст кæнгæйæ чи фæмард, уыцы службæгæнджыты рухс нæмттæ. Уыдысты æцæг патриоттæ, хъæбатыртæ. Сæ цард радтой сабырдзинады сæраппонд. Мидхъуыддæгты министрады сæргълæууæг, пъæлицæйы инæлар-лейтенант Михаил Скоков йе мкусджытимæ Дзæуджыхъæуы Намысы Аллеяйы сæвæрдта дидинджытæ æнусон арты цур. Ам фыст æрцыдысты мидхъуыддæгты оргæнты æдзард кусæджы 204 номы. Ахæм хъæбатыртæй иу уыд Джыбылаты Зауыр. Уый 8 азы размæ, йæ цардыл нæ ауæрдгæйæ, баурæдта террористы, æмæ уымæй аирвæзын кодта сæдæгай адæймæгты. Ацы аз эпидемиологон уавæр хынцгæйæ, Цæгат Ирыстоны мидхъуыддæгты министрады кусджытæ сæ хæдзæртты бабæрæг кодтой 180 æдзард службæгæнæджы бинонтæ, æмæ сын ракодтой зæрдылдарæн лæвæрттæ.
