Афæдзмæ ацы центрæн йæ бон лæггад кæнын уыдзæн 6 мин адæймагæй фылдæрæн
Цæгат Кавказы фыццаг чи у, уыцы ядерон медицинæйы Центр райста фыццаг пациентты. Уæлдæр технологитæм гæсгæ кусæнгæрзтæ фадат дæттынц диагностикæ рагагъоммæ кæнынæн. Фыццаг бон центр балæггад кодта 12 адæймагæн. Иртæстытæ цæуынц лæвар, æнæмæнг медицинон фæдзæхстады полисмæ гæсгæ. Бæлвырддæр хабæрттæ радзурдзæн нæ уацхæссæг Бокоты Виктория.
Æнæниздзинадæн зианхæссæг къуыбæрттæ афоныл сбæрæг кæныны фадат ис Дзæуджыхъæуы ядерон медицинæйы центры. Цæгат Кавказы фыццаг ядерон центр»ПЭТ-Технолоджи» райдыдта рынчъынтæн лæггад кæнын. Низ йæхи куыд дары, уый феныны тæххæй хъæуы цалдæр къæпхæны сæххæст кæнын. Фыццаджыдæр адæймагимæ дохтыр бæлвырд аныхас кæны, уый фæстæ йын скæны фтордезоксиглюкозайы укол. Уыцы хос æрбаласынц алы райсом Стъараполæй. Йæ хæс у баззайын глюкозæ кай фæхъæуы, уыцы чырæгты. Фылдæр та глюкозæ фæхъæуы къуыбæрттæ кæм райдайынц рæзын, уым. Хос ахъары буары хуылфы 50 минуты. Дарддæр рынчыны схуыссын кæнынц позитронно-эмиссион томографы.
Томограф баиу кæны дыууæ къамы: ПЭТ æмæ КТейы. Уый руаджы буар хъыгдард цы ран æрцыди, уый хуыздæр разыны. Диагностикæ бацахсы 20 минуты æмæ рыст нæ дæтты рынчынæн. Æрмæст ацы аппараты диагностикæ нæй кæнæн сывæрджын сылгоймæгтæн æмæ уыргты низтæ кæмæ и, уыцы адæмæн. Медицинон бæлвырдкæнынад ацы центры у лæвар дохтыры направленимæ гæсгæ æмæ æнæмæнг медицинон фæдзæхстады æвдисæнимæ.
Фыццаг бон центр федта 12 рынчыны. Иæ бон у иннæ регионты рынчынты уынын дæр.
Ныр Ирыстоны цæрджытæй ахæм низы хаттæй чи тыхсы, уыдоны диагностикæ кæнынмæ æндæр рæттæм цæуын нал хъæудзæн. Афæдзмæ ацы центрæн йæ бон лæггад кæнын уыдзæн 6 мин адæймагæй фылдæрæн.
