Уыдон аныхас кодтой социалон-экономикон райрæзты фарстатыл
Цæгат Ирыстоны социалон-экономикон райрæзты фарстатыл хицауады сæрдар Тускъаты Таймураз видеобастдзинады фæрцы аныхас кодта экономикæйы райрæзты министр Томайты Хъазыбег, промышленносты æмæ транспорты министр Мæрзойты Владимир æмæ Мæздæджы районы администрацийы сæргълæууæг Олег Яровойимæ. Томайты Хъазыбегимæ ныхас цыд 2018-æм азæй 2025-æм азмæ социалон-экономикон райрæзты мадзæлттыл. Сæрмагондæй та Беслæны генералон пълан æмæ Аланийы саргъуыдыл 1100 азимæ баст куыстытæ куыд цæуынц, ууыл. Æрдзырдтой ма республикæйы национ проекттæ царды куыд æххстгонд цæуынц, ууыл дæр. Министр куыд загъта, афтæмæй национ проекттæм гæсгæ фаронæй фылдæр бакуыстой, æмæ уыцы фæтк фæнысан кодта хицауады сæрдар Тускъаты Таймураз дæр. Томайты Хъазыбег ма радзырдта пандемимæйы рæстæг амалхъом адæмæн льготæты хуызы цы кредитон æххуыс цæуы, уый тыххæй дæр.
Промышленносты æмæ транспорты министр Мæрзойты Владимиримæ та аныхас кодта, ногæй кæй райдыдтой медицинон кусджыты ласын. Уыцы куыст кæны «Автоколонна -1210». Раздæрау ахсджиаг сты хъахъхъæныны фæрæзтæ. Æмæ министр куыд бафиппайдта, афтæмæй маскæтæ нæ республикæйы фаг ис. Куыстуаттæ бахъуаджы сахат цæттæ сты сæрмагонд хъахъхъæнæн медицинон уæлæдарæс æмæ маскæтæ бахуыйынмæ. Дыууæтæ дæр бафиппайдтой, кæд ныртæккæ экономикæ хуыздæр уавæры нæй, уæддæр промышленнон продукцийы рауагъд 130% у фылдæр. Уый баст у коронавирусы ныхмæ тохгæнгæйæ химион буаргъæдтæ кæм ис, уыцы продукцийы рауагъд 4 хаттæй фылдæр кæй фæцис.
Мæздæджы районы сæргълæууæгимæ ныхас кæнгæйæ та Тускъаты Таймураз æрдзырдта социалон-экономикон райрæзты фарстатыл. Олег Яровойы ныхæстæм гæсгæ 9 объекттæй эксплуатацийы радтой 4. 45 бынаты кæм уыдзæн уыцы центрон рынчындонæй фæстæмæ иннæ 3 объектты арæзтадæн сбæрæг кодтой, фæрæзтæ кæцæй ист цæудзысты уый. Республикæйы хицауад бабар кодта, цæмæй фидæны бюджетмæ ацы объект хаст æрцæуа. Мæздæджы администрацийы сæргълæууæг раарфæ кодта республикæйы разамындæн, районмæ стыр æргом кæй здахынц. Загъта, ацы аз сæм кæй фæзындзæн 16 фельдшерон-акушерон пункты. Тагъд байгом уыдзæн, 500 сывæллоны кæм ахуыр кæндзысты, ахæм скъола. 5 рæвдауæндоны та сараздзысты уæлæмхасæн бæстыхæйттæ.
