Уый тыххæй социалон хызты фæрцы фехъусын кодтой лæппуæйы ныййарджытæ
9-аздзыд Цæллаты Давиды реабилитацийæн æхца сæмбырд кодтой. Уый тыххæй социалон хызты фæрцы фехъусын кодтой лæппуæйы ныййарджытæ. «Фæстаг дыууæ боны нæ телефонтæм цыдысты бирæ хъусынгæнинæгтæ. Се ппæт дæр дзурæг уыдысты ууыл, æмæ зæрдæхæлар адæм æрвыстой фæрæзтæ. Уыйбæрц бирæ уыдысты, æмæ нырма се ппæтæн дзуапп дæр нæма радтам. Къуырийы размæ дæр ма нæм, сæххæстгæнæн кæмæн нæй, ахæм бæллиц касти, фæлæ абон уыцы стыр амонд нæ къухы бафтыд», загъд ис сæ хъусынгæнинаджы. Уæ зæрдыл уын æрлæууын кæндзыстæм, Давид хъыгдард баййæфта июны, тынг дымгæ куы кодта, уæд. Ирхæфсæн фæзы хъазгæйæ, гыццыл лæппуйыл æрхауди бæлас, æмæ Давидæн йæ сæр фæци уæззау цæф. Республикæйы сывæллæтты клиникон рынчындоны реаниматологты фæрцы Давид удæгасæй баззади. Фæлæ йæ æнæмæнг хъуыди реабилитаци ацæуын. 9-аздзыд лæппуйы цард аирвæзын кæныны тыххæй паддзахадон телерадиокомпани «Алани» радзырдта программæ «Пульс»-ы. Мæйы размæ Цæллаты Давиды ныййарджытæ райдыдтой фæрæзтæ æмбырд кæнын. Лæппуйы дзæбæх кæндзысты Гуттманы клиникæйы Испанийы. Ныр уыцы хъуыддаг зæрдæхæлар адæмы фæрцы хъуамæ сæ къухы бафта.
