Металлургты Галуаны сценæйы æвæрд æрцыдис Брытъиаты Созырыхъойы аргъаумæ гæсгæ вæрд спектакль «Красавица замка большого утеса»
Театр «Саби» ацы аз бæрæг кæны йе 80 азы юбилей. Парахатдæрæй йæ сбæрæг кæндзысты уалдзæджы. Ныртæккæ театры цæуы бындурон цалцæг. Ахæм бæстон куыст дзы 80 азмæ конд цæуы фыццаг хатт. Хъуыддæгтæ арæзт цæуынц национ проект «Культура»-мæ гæсгæ. Федералон бюджетæй сын дихгонд æрцыд 32 милуан сомы. Фæнд кæнынц бæстыхайы сæр баивын, дыккаг уæладзыг сцалцæг кæнын, электрон тыхдæттæг хызтæ сног кæнын, стæй театры кæрт саив кæнын. Ног сезонмæ та коллектив бацæттæ кодта цалдæр спектаклы. Гæджиты Сослан – бæлвырддæр.
Зындгонд хъуыддæгты тыххæй театралон сезон зæрдæйы фæндон ахадгæ нæ рауади. Раздæры азты премьерæтæ æмæ адæмæн уарзон спектакльтæ æвдыстой фылдæр.
Сывæллæтты театр «Саби»-йæн йæ сезон, зæгъæн ис, æмæ нырма ныр райдайдзæн. Пандемийæйы аххосæй æмæ театры бæстыхай цалцæггонд кæй цыди, уый тыххæй коллектив аивадуарзджытæн спектакльтæ фаг нæ равдыста. Æмæ ныр, металлургты Галуаны сценæйы æвæрд æрцыдис Брытъиаты Созырыхъойы аргъаумæ гæсгæ вæрд спектакль «Красавица замка большого утеса».
Брытъиаты Созырыхъойы аргъауимæ зонгæ чи у, уыцы аивадуарзджытæ уайтагъд банкъардзысты режиссеры куыст. Багъраты Иринæйы бафæндыди спектакльмæ гыццыл драмон сценæтæ бафтауын. Æмæ æрмæст уыцы хицæндзинад нæ бахаста автор. Фæлæ, зæгъæм, куклатæн бæлвырд цæсгæмттæ кæй нæй, уый. Режиссеры æрхъуыдыдзинадмæ гæсгæ, уыцы ногдзинад актертæн ратдзæни фылдæр гæнæнтæ. Ныр хъайтарты миддуне бамбарæн ис сæ бакастмæ гæсгæ нæ, фæлæ артистты архайдмæ гæсгæ. Фыццаг спектакль æвæрдтой сабитæн, фæлæ бамбарæн ис, хистæртæн дæр дзы бирæ æууæлтæ кæй ис, уый. Аргъауы мидис уый у, æмæ адæймаг цыфæндыйæ дæр хъуамæ фидар къахдзæфтæй цæуа йæ бæллицмæ.
Спектакль æвæрд æрцыди уырыссаг æвзагыл. Театры труппæйæн фадат уыдзæни ацы спектакль гастрольты равдисынæн дæр.
19-æм декабры ма театр равдисдзæн ноджыдæр иу премьерæ «Абрикосовая косточка». Ног азы бæрæгбæтты та сабитæм æнхъæлмæ кæсы аргъау «Митын чызджы амонд».
