Арæзтады æмæ цалцæджы объекттыл районы администрацийы минæвæрттæ сарæзтой пресс-тур
Кировы районы æххæст кæнынц национ æмæ федералон программæтæ. Арæзтады æмæ цалцæджы объекттыл районы администрацийы минæвæрттæ сарæзтой пресс-тур. Журналисттæн равдыстой, куыстытæ ныр кæцы къæпхæныл сты, уый. Цавæр объекттæй сфидаудзæн район, уый тыххæй радзурдзæн Моргуаты Ладæ.
Кировы районы Даргъ-Къохы культурæйы хæдзар цæттæ у йæ дуæрттæ байгом кæнынмæ. Национ проект «Культурæ»-йы фæлгæты дзы скодтой бындурон цалцæг. Баивтой йæ сæр, рудзгуытæ, базылдысты къултæм. Мидæгæй йæ иууылдæр саив кодтой, баззад мæ стъолтæ, бандæттæ æмæ æндæр хъæугæ дзаумæттæ баласын. Нысан кæнынц Ног азæй фæстæмæ сывæллæттæ хъæппæрисадон къордты куыст сног кæнын.
Дарг-Къохы цæрджытæн тынг æхсызгон уыд сæ сывæллæттæн спортивон фæз кæй сарæзтой, уый дæр. Хъæу у стыр æмæ ахæм гом спортивон фæзуат хорз лæвар у. Ног фæзуат ис скъоламæ хæстæг, фæлæ астæуыккаг ахуыргæнæндоны бæстыхай у цалцæггæнинаг.
Кæрдзыныхъæуы та кæронмæ фæхæццæ кæны амбулаторийы арæзтад. Куыстытæ райдыдтой майы, ныртæккæ цæуынц аивгæнæн куыстытæ. Хæстæгдæр рæстæг хъуамæ фæуой.
«Фыдыбæстæйы хъахъхъæнджыты ном сæнусон кæныны тыххæй» нысанмæ арæзт федералон программæмæ гæсгæ Комсомольскæйы хъæуы бындуронæй сцалцæг кодтой æфсымæрон ингæн. Сæвæрдтой ног къæйдуртæ æмæ базылдысты фæзуатмæ. Ныр мемориал дардмæ дæр бæрæг дары.
Æдæппæтæй ацы азы кæронмæ эксплуатацийы ратдзысты 6 социалон-ахсджиаг объекты. Районы администрацийы зæгъынц æппæт куыстытæ кæй фæуыдзысты афойнадыл.
