Нырма рæстæг ис, фæлæ адæм сæхи цæттæ кæнын райдыдтой рагацау
Æрхæццæ кæны æфæдзы сæйрагдæр бæрæгбон Ног аз. Нырма рæстæг ис, фæлæ адæм сæхи цæттæ кæнын райдыдтой рагацау. Æлхæнынц лæвæрттæ, хойрæгтæ, уæлæдарæс. Горæты байгом сты ног азы армукъатæ. Заз бæлæстæй уæлдай дзы балхæнæн ис сувениртæ æмæ хъазæнтæ. Армукъатæ ахæсдзысты суанг 31-æм декабрьмæ. Æрзылд сыл не сфæлдыстадон къорд дæр. Бæлвырддæр – Касаты Наирæ.
Заз бæлæсты æппæты стырдæр армукъа ис Барбашовы уынджы, олимпаг парчы районы. Ног азмæ нырма рæстæг ис, фæлæ дзы ныридæгæн адæм ис бирæ. Зæгъын хъæуы уый, æмæ, фаронимæ абаргæйæ, ног азы фидауцæн йæ аргъ нæ аивта. Бæрæгбоны символ балхæнæн ис 500 сомæй дæр. Уæй кæнынмæ цы зыз бæлæстæ равæрдтой, уыдон сластой нæ бæстæйы алыхуызон питомниктæй. Бæлæстæ дзы ис фæсарæнтæй дæр. Уыдон сты зынаргъдæр.
Ацы аз горæты кусдзæн заз бæлæсты 46 бынаты. Ног азы фидауцы бæлæстæ бæбæрæг кæнæн уыдзæни 31-æм декабрьмæ. Гом кæнынц Ног азы хъазæнты армукъатæ дæр. Уыдон æдæппæтæй уыдзысты 4. Цæрджыты æнцойдзинадæн палаткæтæ байгом кодтой Дзæуджыхъæуы алы районы дæр. Ног азы сувениртæ балхæнæн ис Сабырдзинады проспекты, Владикавказскийы уынджы æмæ «Алан»-ы базары дæр. Продукци алыхуызон, æргътæ ныллæг. Адæм хъазæнтæ æлхæнынц иу хуызы куыд уой, афтæ, кæнæ та дизайнмæ гæсгæ. Фæлæ атрибутикæ балхæнæн ис иугай дæр. Иу ныхасæй, кæй куыд фæнды, афтæ. Кочиты Маринæ бирæ азты адæмы зæрдæтæм цин хæссы ног азы аивгæнæнтæй. Ис ын, æппынæдзух æм чи æлхæны, ахæм æхæмтæ дæр. Маринæ куыд зæгъы, афтæмæй ацы аз пандемийæйы тыххæй дызæрдыг кодта, бирæ товар иса, æви нæ, ууыл.
Фыццаг хатт бæрæгбоны сувениртæ балхæнæн ис Сæрибары фæзы дæр. Сувениртæ, кæнгæ заз бæлæстæ, костюмтæ. Адæймаг дзы æнæмæнгæй ссардзæн хъæугæ товартæ.
