Ацы аз та горæт сæрттивдзæн бæрæгбоны ирд рухсытæй
Ацы аз кæд пандемияйы аххосæй зынгæ ивддзинæдтæ рцыди, уæддæр республикæйы алы районы дæр архайынц бынæттон цæрджыты зæрдæтæ барухс кæныныл. Уæлдайдæр та ног азы бæрæгбоны агъоммæ. Алагиры районы сæйраг уынгтæ аив кæнын райдыдтой 2017-æм фæстæмæ. Ацы аз та горæт сæрттивдзæн бæрæгбоны ирд рухсытæй. Алагиры скуыста цыппурсы армукъа. Йæ фарсмæ та – заз бæлæсты базартæ. Фидараты Маринæ радзурдзæн бæстондæр.
Аланæ цæры Цæлыккаты хъæуы. Йе мбал чызгимæ æрбацыди Алагиры сæйраг аллейæмæ, сæрмагондæй ног азы заз бæлас фенынмæ. Ацы чызджытæн уый сси бæрæгбоны традици. Куыд зæгъынц, афтæмæй алцыдæр хорз у, æрмæст мит кæй нæй, уый сæ æрхæндæг кæны.
Синоптикты бæрæггæнæнтæм гæсгæ, уавæрæн сраст кæнæн ис. Алагиры администрацийы разамынды хъуыдымæ гæсгæ та ацы аз горæт сæрттивдзæн бæрæгбоны ирд ахорæнтæй. Ног азы фидауц – сæйраг заз бæлас саив кодтой шартæй æмæ гирляндæтæй. Раздæрау, стыр бæрæгбон æмæ салют пандемияйы аххосæй нæ уыдзæн, фæлæ хъæлдзæг зæрдæйы ахастæн æнæ уæвгæ нæй.
Алагиры скуыста цыппурсы армукъа дæр. Сæ продукци дзы равæрдтой канд бынæттон амалхъом адæм нæ, фæлæ ма сыхаг республикæты минæвæрттæ дæр. Сæ фарсмæ та кусынц заз бæлæсты базартæ дæр. Бæрæгбоны тæваг тынгдæр банкъарæн ис, куыддæр æрбаталынг вæййы, афтæ. Горæты аллейæ аныгъуылы алыхуызон ирд рухсыты.
Ам фенæн ис аргъæутты хъайтарты, дисы фтауæг цæхæркалгæ дзаумæттæ. Фыццаг хатт районы центр сæрттывта 2017-æм азы. Ацы хатт бæрæгбонмæ ивддзинæдтæ бахаста коронавирус, фæлæ бынттон цæрджытæ уæддæр æнхъæлмæ кæсынц алæмæты æнкъарæнтæм.
Алагиры ног азы бæрæгбон, æнæмæнг, уыдзæн. Кæд æнæ уæлдай кадджын мадзæлттæй, уæддæр зæрдæйы фæндон. Ууыл бынæттон администрацийы кусджытæ рагацау бакуыстой, цæмæй алагирæгтæ ног азы къæсæрыл бахизой рæсугъд æнкъарæнтимæ.
