Ахæм цаутæй бахизыны тыххæй специалисттæ сидынц, цæмæй адæм сæ цæст дарой газы системæйы уавæрмæ
Хæдзары хъармæн йæ бон у иу минутмæ бирæ æвзæр хъуыддæгтæ расайын. Дæсгай бинонтæ æрвылаз хъыгдард баййафынц, газы системæ сæ хæдзæртты æмбæлгæ уавæры кæй нæ кусы, уымæй. Ацы аз газ хæтæлæй хибарæй кæй цыди, уымæй хъыгдард баййæфтой 12 бинонтæ. Ахæм цаутæй бахизыны тыххæй специалисттæ сидынц, цæмæй адæм сæ цæст дарой газы системæйы уавæрмæ.
Иу хæдзарæй иннæмæ. Газы кусæнгæрзтæ сбæрæг кæнын зын хъуыддаг нæу, фæлæ уый, специалисты кæд мидæмæ бауадзой, уæд. Се ппæт фысымтæн газы службæйы кусджытæ зæрдиаг уазджытæ не сты.
Фæлæ чи сразы уа, уыдонæн сæ газы кусæнгæрзтæ специалисттæ сбæрæг кæнынц æххæстæй. Пецтæ, хъармгæнæнтæ… Системæ куыд кусы, сæйрагдæр та – газ искуыцæй уадзы, æви нæ, уый.
Газы службæйы кусджытæ æрмæст æдасдзинады мадзæлттæ не ххæст кæнынц. Сæ хæс у, æнæзакъонæй газы хыз чи баиу кæны, уыдонимæ тох кæнын. Афтæ, ам дæр. Дзулфыцæн пец æвæрд ис кæрты, кæй зæгъын æй хъæуы, æдасдзинады техникæйæн дзы йæ кой дæр нæй. Специалисттæ йæ ахуыссын кодтой, хæтæл æрæхгæдтой, цæмæй дзы газ мауал цæуа, афтæ. Уый у фыццаг домæн адæмы æдасдзинадæн.
Æрвылаз газы службæйы кусджытæ рейдтæ саразынц хæдзæртты системæ куыд кусы, уы сбæрæг кæныны тыххæй. Хъыгагæн бирæ адæм уымæ хорз цæстæй нæ кæсынц, нæ байгом кæнынц дуæрттæ. Уый та арæх йæ фæстæ хорз хъуыддæгтæ нæ расайы, зæгъынц эксперттæ. Ацы хъармгæнæн сезон республикæйы угары газæй хъыгдард баййæфтой 12 адæймаджы. 6 -æй дзы амардысты. Специалисттæ куыд зæгъынц, афтæмæй гæнæн уыди, хъуыддаг ахæм уавæрмæ ма руадзынæн. Хæдзары хицæуттæ афоныл газы кусæнгæрзтæ куы бæрæг кодтаиккой, уæд.
Кæд исчи йæ хæдзары газы системæйы куыстыл дызæрдыг кæны, газы тæф æмбары, уæд æвæстиатæй хъуамæ æрæхгæна газ кæцæй цæуы, уыцы хæтæл æмæ бадзура аварион службæмæ ахæм номертæй – 04 кæнæ та – 114.
