Апрелы онг æй хъуамæ ацæуой цæрджыты 30 проценты онг
Нæ республикæйы цæуы коронавирусы ныхмæ егъау вакцинаци. Апрелы онг æй хъуамæ ацæуой цæрджыты 30 проценты онг. Уый фадат ратдзæн коллективты иммунитет фæфидар кæнынæн. Прививкæ скæныны фадат ис алкæмæн дæр. Фыццаджыдæр дзы спайда кæндзысты социалон æмæ медицицнон къабазы кусджытæ, æфсæддонтæ, мидхъуыддæгты министрады æмæ администрациты минæвæрттæ. Æнæниздзинадхъахъхъæнынады министрад се ппæты зæрдыл лæууын кæны, процедурæ у лæвар, уыимæ фæндонмæ гæсгæ. Хи бафыссæн ис куыд колл-центрты æмæ медицинон куыстуæтты регистратурæты, афтæ Паддзахадон лæггæдты порталы дæр. Дзæуджыхъæуы 1-æм, 4-æм æмæ 7-æм поликлиникæтæй дарддæр прививкæты кæнын райдыдтой Мæздæджы районы дæр. Ныридæгæн прививкæ чи скодта, уыдоны тыххæй радзурдзæн Фидараты Маринæ.
Павел Серков у студент. Йæ ахуырæй уæгъд рæстæг кусы æхсæнадон организацийы. Фыццæгтимæ иумæ сфæнд кодта коронавирусы ныхмæ прививкæ скæнын. Ныридæгæн скодта дыккаг, кæронбæттæн процедурæ. Фæткмæ гæсгæ вакцинæ скæнынц дыууæ къæпхæнæй, се хсæн æнæмæнг хъуамæ рацæуа 20 боны. æрыгон лæппу ныртæккæ йæхи æнкъары иттæг хорз.
Йæ буары тæвд не схызти. Фæлæ вакцинæ скæныны фæстæ, фыццаг цалдæр боны адæймагæн йæ бон у йæхи лæмæгъæй æнкъарын, зæгъынц медицинон кусджытæ. Уым диссагæй æппындæр ницы ис. Дохтыртæ сæхæдæг дæр, ома ацы поликлиникæйы кусджытæ фыццæгтæ скодтой прививкæтæ.
Æдæппæтæй нæ республикæйы сентябры кæронæй абоны онг вакцинаци ацыдысты 562 адæймаджы. Уыдонæй дыккаг компонент райстой 87-æй.
«Спутник V»-йы прививкæ скæнын æмбæлы, 18 уæлæмæ кæуыл цæуы, уыдонæн. Медиктæ зæгъынц, иртæстыты радон къæпхæн фадат дæтты вакцинæ скæнын, 65 азæй фылдæр кæуыл цæуы, ахæм адæмæн дæр. Æрмæст æнæмæнг хъæуы дохтырæй консультаци райсын, цæмæй æппæт лыстæг хъуыддæгтæ дæр хыгъд æрцæуой, уый тыххæй.
