Ныртæккæ паддзахадон программæмæ хаст æрцыдысты льготникты цалдæр категорийы
Цæрæнуæттæ самал кæнæн сси æнцондæр. Уый хауы ахуырады, культурæйы, медицинæйы æмæ æндæр ахсджиаг къабæзты специалисттæм. Субсидитæ дæттынц, æрыгон специалисттæн æххуысы республикон программæ æххæст кæнгæйæ. Бæлвырддæр – Фидараты Маринæ.
Реуазты Фатимæ у дохтыр-хирург. Кæд æрыгон у, уæддæр фæлтæрдджын специалистыл нымад у. Эндоскопийы къабазы кусы 6 азы. Йæхæдæг фæкæны операцитæ. Адæмæн æххуыс кæны се нæниздзинад фæхуыздæр кæныны хъуыддаджы.
Республикæйы клиникон рынчындоны суткæгай рад кæй фæхæссы, уый кæд зын хъуыддаг у, уæддæр æрыгон чызгæн йæ дæсныйад йæ зæрдæмæ цæуы. Æндæр куыд ис алы кусгæ бон дæр Алагирæй Дзæуджыхъæумæ цæуæн. Йæ нысанты ис йæ цæрæнбынат йæ куысты бынатмæ хæстæгдæр раивын. Æрыгон специалисттæн уый хъуамæ бантыса, æххуысы сæрмагонд республикон программæйы фæрцы. Уыимæ ма субсидиты бæрц фарон 400 мин сомæй фæфылдæр 500 мин сомы онг. Фатимæ ныридæгæн райста цæрæнуатæн сертификат. Уыдонæй 600 мин сомы ацæудзысты фыццаг фиддонæн.
Программæйыл Битарты Вячеславы хъæппæрисæй бакуыстой 2016-æм азы. Субсидитæй йæ бон спайда кæнын у, 40 азы онг кæуыл цæуы, ахæм специалисттæн. Фыццаг уал хъæуы бынæттон администрацимæ бацæуын, æмбæлгæ гæххæттытæ сæмбырд кæнын, цæмæй бæрæг уа, адæймаг æцæгæйдæр цæрæнуат хъуаг у, æви нæ, уый. Æххуысы программæйыл зæрдæ дарæн ис культурæйы, ахуырады, медицинæйы æмæ æндæр къабæзты кусджытæн. Зæгъæм, æрыгон ахуыргæндтæн æмæ дзыллон информацион фæрæзты минæвæрттæн.
Ацы хъуыддагыл бæстон æрныхас кæндзысты хицауады радон æмбырды. Æмтгæй райсгæйæ, ивгъуыд азы куысты хатдзæгтыл радзырдта арæзтады æмæ архитектурæйы министры фыццаг хæдивæг Куцукты Анзор. 2020-æм азы мин бинонты онг райстой æххуыс, цæрæнуæттæ самал кæныны хъуыддаджы. Ныртæккæ паддзахадон программæмæ хаст æрцыдысты льготникты цалдæр категорийы. Се хсæн сты æрыгон бинонтæ, Чернобылы фæстиуджытæ иуварсгæнджытæ, æрлидзæг адæм, инвалидтæ, хæстон цауты ветерантæ, æмæ афтæ дарддæр. Æдæппæтæй цæрæнуæтты фарстатæ лыг кæнынæн Ирыстонæн радих кодтой 2 миллиарды æмæ 500 милуан сомы. Уыйбæрц фæрæзтæ раздæр никуы лæвæрд цыдысты. Сæ фылдæр хай радих кодтой æрлидзæг адæмæн. Финансон æххуысы фæрцы бантыст 800 сертификаты раттын.
Æххуыс райстой æрыгон бинонтæ дæр. 2020-æм азы цæрæнуæттæн сертификаттæ радтой 84 бинонтæн.
