Традицимæ гæсгæ дзы равæрынц фысымуæтты æмæ ресторанты бизнесы стæй кулинарийы дæнцæгтæ
Компани «Бавария» архайы Персайнаг бакæлæны бæстæты 26-æм Æппæтадæмон равдысты Gulfood-2021. Традицимæ гæсгæ дзы равæрынц фысымуæтты æмæ ресторанты бизнесы стæй кулинарийы дæнцæгтæ. Ацы хатт нæ республикæйы стенды фенæн ис минералон дон «Тбау». Рацарæзты фæстæ аивта йæ авджы хуыз, æмæ йæ этикеткæйы дизайн. Уымæй дарддæр «Баварийы» продукци равæрдтой, Дубайы астæу цы нырыккон демонстрацион-дегустацион павильон ис, уым. Хуыйны «Русский продуктовый дом», æмæ йæм хаст æрцыдысты хуыздæр уæрæсейаг куыстуæтты продукцийы хуызтæ.
Павильоны уазджытæ æмæ партнертæ сты алыхуызон компанитæ. Бæлвырддæр та уæрæсейаг хойраджы продукттæ чи лхæны, ахæм куыстуæттæ. «Уырыссаг хæдзары» экспозицийы фенæн ис æрмæстдæр бирæвæрсыг бæрæггæнæн куыст чи ацыди, ахæм хойраджы продукци. «Баварийы» хæрзхъæддзинад хорзыл банымадта нæ бæстæйы хъæууон хæдзарады министры хæдивæг Сергей Левин. Уæ зæрдыл уын æрлæууын кæндзыстæм, «Бавария» сси фыццаг ирыстойнаг компани, сæрмагонд сертификат райсын кæмæн бантыст, ахæм. Уыцы сертификат фадат дæтты продукци Персайнаг бакæлæны бæстæты парахат кæнынæн. Зæгъдзыстæм ма уый дæр, æмæ дон «Тбау» æнтыстджынæй ацыд бæрæггæнæн куыст 118 домæнмæ гæсгæ.
