Уый тыххæй республикæйы сæргълæууæг Битарты Вячеславæн фехъусын кодта инвестор Гуыриаты Владимир
Цæгат Кавказы афæдзы æппæтафонты тематикон парк «Алания парк»-ы проекты фыццаг къæпхæн фæуыдзæн 2022-æм азы. Уый тыххæй республикæйы сæргълæууæг Битарты Вячеславæн фехъусын кодта инвестор Гуыриаты Владимир. Уыцы рæстæгмæ курорты фæзуатыл сараздзысты фысымуат, лæггадгæнæг центр, инвентарь рæстæгмæ кæм райсæн уыдзæн, ахæм бынат, хæрæндон, машинæтæ æвæрæн, бацæттæ кæндзысты къахдзоныгътыл бырыныл ахуыргæнæн фахс æмæ аттракционтæ. Уый уыдзæн Дзæуджыхъæуы Цæгæрсæр хохы фæзы.
Æрдзырдтой ма туристон рекреацион комплекс «Мамысон»-ы объектты арæзтадыл. Ам Гуыриаты Владимир хæссы инвестициты фылдæр хай. Куыд фæнысан кодтой, афтæмæй, цæмæй проект царды æнтыстджынæй сæххæст уа, уый тыххæй алы ведомствæтæ хъуамæ кусой æмдыхæй.
Битарты Вячеслав раарфæ кодта Гуыриаты Владимирæн, республикæйы ахсджиаг объектты арæзтадмæ стыр æвæрæн кæй хæссы, уый тыххæй.
