Ацы программæйы фæрцы ис хи бизнес байгом кæнæн, кæнæ та куысты ныллæууыны фадат ис фæкæсынхъуаг адæмæн
150 милуан сомæй фылдæр радих кодтой нæ республикæйы мæгуырдзинадимæ тох кæнынæн. Ацы программæйы фæрцы ис хи бизнес байгом кæнæн, кæнæ та куысты ныллæууыны фадат ис фæкæсынхъуаг адæмæн. Ныртæккæ уал программæйы фæрцы куысты бынæттæ ссардтой 116 адæймагæн. Бæлвырддæр радзурдзæн Фидараты Маринæ.
Инесса Овасапян у бирæсывæллонджын мад. Декретæй куы рацыди, уæд бирæ рæстæг йæ бон куыст ссарын нæ уыди. Уыимæ та йæ бинонтæ уыдысты æхцахъуаг. Ацы фарста алыг кæнынæн стыр æххуыс бакодта паддзахад. Инессæйæн фадат фæци сывæллæтты рæвдауæндоны хъомылгæнæджы æххуысгæнæгæй кусынæн.
Инессæйæн куысты бынат ссарын бантыст, федералон программæ «Мæгуырдзинадимæ тох»-ы социалон контракт æххæст кæнгæйæ. Уый бафыссынц социалон хъахъхъæнынады оргæнты минæвæрттæ æмæ фæкæсынхъуаг адæм. Бæрнон службæ та сын, контракты бындурыл ссары куыстдæтджыты.
Социалон контракт у социалон æххуысы хуызтæй иу. Бакæнынц æй, куыст ссарын кæй фæнды, ахæм фæкæсынхъуаг адæмæн. Ныртæккæ программæйы фæрцы куысты ныллæууыдысты 116 адæймаджы.
Федералон программæ «Мæгуырдзинадимæ тох» нæ республикæйы æххæстгонд цæуы 3 хуызмæ гæсгæ. Райдайгæ фермертæн дæттынц гранттæ, ногæй цæттæ кæнынц кадртæ, æмæ паддзахадон контракттæ бафыссынц фæкæсынхъуаг адæмимæ. Уыцы куыстытæн радих кодтой 150 милуан сомы.
