Йæ куыст ын рæстæгæй-рæстæгмæ сбæрæг кæнынц Æнæнхъæлæджы уавæрты министрады специалисттæ
Цардæн тæссаг уавæр куы сæвзæра, уæд уый тыххæй адæмæн фехъусын кæны сæрмагонд системæ. Йæ куыст ын рæстæгæй-рæстæгмæ сбæрæг кæнынц Æнæнхъæлæджы уавæрты министрады специалисттæ. Цæмæй адæм ма фæтæрсой æмæ ма стыхсой, уый тыххæй хъæрæйдзурæнты фæрцы хъусынгæнинаг апарахат кæнынц рагагъоммæ. Цы ма хаст цæуы хъусынгæнæн системæмæ, уый тыххæй радзурдзæн Гуытъиаты Алинæ.
Республикæйы æнæнхъæлæджы цауты миниистрады управлени кусы цæттæдзинады фæткы. Системæ æркусдзæнис цалдæр минуты фæстæ — хъуамæ сигнал афойнадыл бацæуа радиотелеуынады центрмæ. Уым та æркусдзæнис хъусынгæнинаг.
Ахæм бынæттæ горæты цалдæр сты. Терчы былгæрон, стратегион объекттæ æмæ карз фæткмæ гæгсæ чи кусы, уыцы организацитæм æввахс ис телыхъæдтæ хъæрæйдзурæнтимæ.
Æнæнхъæдæджы цауты министрады куыд хъусын кæнынц, афтæмæй фæдисы системæ æркусын кæнынц, цæмæй йын йæ цæттæдзинад сбæрæг кæной. Адæммæ сидынц, цæмæй уавæр æмбарой æмæ ма тæрсой — ахæм иртæстытæ афæдз дыууæ хатты уыдзысты. Хъуыдыйаг у уый дæр, æмæ цæрджытæй бирæтæ зæгъынц, мадзалы тыххæй рагагъоммæ кæй базыдтой, уый.
Ведомствæ адæмы зæрдыл лæууын кæны — гæнæн ис æмæ цыфæнды афон дæр æркуса радио æмæ телеуынады эфир бацахсыны программæ.
Фидæны ахæм хъусынгæнинæгтæ цæудзысты мобилон телефонтæм æмæ электрон фæрæзтæм. Ныртæккæ та уал кусынц уыцы фæтк саразыныл.
