Пресс-туры боны фæткмæ хаст æрцыди цалдæр ахсджиаг фарстайы
Дзæуджыхъæуы аивгæнæн куыстытæ куыд цæуынц, уый дзыллон информацийы фæрæзты минæвæрттимæ иумæ федтой горæты администрацийы минæвæрттæ. Пресс-туры боны фæткмæ хаст æрцыди цалдæр ахсджиаг фарстайы. Се хсæн – бæлæстæ куыд æхсæдынц, уый, Сæйраг базары раз æнæзакъон уæйгæнæн бынæттæ, стæй Сабырдзинады проспекты рацарæзт. Цавæр хатдзæгтæ скодтой бæрнон кусджытæ, уый тыххæй бæстон радзурдзæн Фидараты Маринæ.
Бæлæстæ æхсæдын у æнæмæнг хъæугæ хъуыддаг. Цæгат Ирыстоны медицинон колледжы территорийы, йæ алыварс, стæй Колыты Аксойы скверы рдыгæй цæуынц аивгæнæн куыстытæ. Уый фæдыл курдиат ахуыргæнæндоны разамынд иу æмæ дыууæ хатты нæ лæвæрдта. Уымæн æмæ-иу дзы арæх сæвзæрд цардæн тæссаг уавæртæ, къалиутæ хаудысты бынмæ. Ныр горæты администраци фарстамæ йе ргом аздæхта. Аивгæнæн куыстытæ кæнынц «ВладЗеленСтрой»-йы специалисттæ.
Нæзы бæлæсты кой куы кæнæм, уæд хъуамæ уæвæг дæр ма уой ахæм ахуыргæнæндæтты территорийы, зæгъынц Дзæуджыхъæуы администрацийы. Уымæн æмæ сæ уидæгтæ сты лæмæгъ. Афтæмæй та бæлæстæ фидар нæ фæлæууынц, æмæ æрдзы хивæнд митæм дæр быхсон нæ разынынц. Фæлæ ацы бæлæстæн фæтæригъæд кодтой, уымæн æмæ сæ раджы ныссагътой. Æрмæст сын сæ хус къалиутæ акалдтой, æмæ сын сæ уавæрмæ бæстон æркастысты. Уынаффæ рахастой дыууæ бæрнон куыстуаты.
Иннæ объект – горæты сæйраг базар. 8-æм мартъийы агъоммæ пъланмæ гæсгæ рейдтæ аразынц префектурæйы кусджытæ. Бæрæг кæнынц æнæзакъон уæйгæнæн бынæттæ. Рахизфарсы администрацийы зæгъынц, ахæм бынæтты уæй кæнын æдас хъуыддаг нæу. Уый иу, фæлæ ма зындзинæдтæ æвзарынц кæнынц фистæгæйцæуджытæн æмæ машинæтæн дæр. Административон-техникон инспекцийы кусджытæ зæгъынц, сбæлвырд кодтой цалдæр уæйгæнæн бынаты – сæрмагондæй дидинджыты армукъатæн.
Журналисттæ се ргом аздæхтой Сабырдзинады проспектмæ дæр. Ам канд фæндаджы уæлцъар нæ ивынц, фæлæ ма аив кæнынц алфамбылай территори дæр. Куыстытæ цæуынц пъланмæ гæсгæ. Ныртæккæ ивынц дондзæуæн хызтæ.
Уыдзæн ма цалдæр ногдзинады дæр. Уыдон зынгæ саив кæндзысты горæты сæйраг уынгтæ. Куыстытæ æххæстæй фæуынмæ хъавынц декабры кæронмæ. Уæд рельсытæм ногæй рацæудзысты трамвайтæ дæр. Сæ фæндаг ныридæгæн у цæттæ.
