Фенæн дзы ис алыхуызон сфæлдыстадон куыстытæ: куклатæ, уæлæдарæс, нывтæ, скульптурæтæ
Сылгоймæгты æппæтадæмон боны агъоммæ Дзæуджыхъæуы байгом цымыдисаг равдыст «Сылгоймаджы уд». Фенæн дзы ис алыхуызон сфæлдыстадон куыстытæ: куклатæ, уæлæдарæс, нывтæ, скульптурæтæ. Равдыстмæ сæ аивад бахастой 50 æрмдæсныйы республикæйы алы районтæй. Се ппæт дæр æвдисæг сты сылгоймаджы миддуне æмæ йе нкъарæнтæ. Цымыдисаг экспозици федта нæ уацхæссæг Томайты Батраз, æмæ йын ныхасы бар.
«Сылгоймаджы уд». Ахæм сæргондимæ цымыдисаг экспозици байгом ацы бонты Дзæуджыхъæуы. Хаст æм æрцыд 500 куыстæй фылдæр. Сæ нывтæ йæм бацæттæ кодтой республикæйы æппæт районты минæвæрттæ. Алкæцы куыст дæр у хицæн ныхасы аккаг. Уымæн æмæ конд сты алыхуызон æрмæгæй. Чи ахорæнтæй, чи бæмбæгæй, суанг ма дзы фенæн ис советон рæстæджы ист мультипликацион нывтæй хъайтарты дæр. Уæвгæ, нывгæнæг Любовь Пушкарева-Портнова куыд зæгъы, афтæмæй йæ æрмдæсныйадмæ æфтауы афæдзы афонтæй рæсугъддæр – уалдзæг. Уымæн æмæ уæд райхæлы адæймаджы уд. Ацы равдыстмæ та нывгæнæг сæрмагондæй бацæттæ кодта цалдæр куысты: Къостайы райгуырæн бæстæ, Дыгургомы мæсгуытæ, уалдызгон æмæ фæззыгон дидинджытæ æмæ афтæ дарддæр. Хатгай йæ нывы сюжет райсы хуымæтæг дзаумайæ. Зæгъæм, нæзы бæласы къалиу.
Авторы ныв «Любимая сирень» конд у æцæг дидинджытæй. Равдыстмæ æрбацæуджытæ йын скодтой стыр аргъ.
Зæгъын хъæуы уый, æмæ ахæм равдыст арæзт æрцыд фыццаг хатт. Цæгат Ирыстоны культурæйы министрады куыд бафиппайдтой, афтæмæй нывгæнджытæн æмæ æрмдæснытæн фадат фæци сæ сфæлдыстад стыр аудиторийы размæ рахæссынæн.
Цымыдисаг экспозици «Сылгоймаджы уд» дисы бафтыдта се ппæт æрбацæуджыты дæр. Бынæттон авторты ирддæр нывтæ ма фенæн уыдзæн ацы мæйы кæроны онг.
