Æххуыс та сын у регионæн разамынд дæттыны Центр
Æнæзакъон бырондон, рухс æмæ доны фарстатæ, хъармгæнæн системæйы куыст. Ацы æмæ æндæр хъуыддæгтæ алыг кæнын амæй фæстæмæ республикæйы цæрджытæн уыдзæн æнцондæр. Æххуыс та сын у регионæн разамынд дæттыны Центр. Æрæджы райдыдта кусын, фæлæ йæ банымайæн ис ахадгæ ведомствойыл. Цавæр хатдзæгтæ уал скæнæн ис, уый тыххæй радзурдзæн Фидараты Маринæ.
Ныртæккæ дон хорз кæлы. Раздæр та колонкæ ссудзынæн дæр фаг нæ кодта. Арæх дон уæвгæ дæр нæ уыди, уыимæ дыгай къуыритæ, зæгъы Суададжы цæрæг Къæлхидты Алан. Куыд радзырдта, афтæмæй сæ кæрты скъахтой дзыхъ, æмæ йæм æрдзон хорзæх бауагътой сæ фарсмæ кæлæг цæугæдонæй. Пайда дзы кæнынц сæ хæдзарон куыстыты, уымæн æмæ дарынц фос. Фæлæ æмбæрстгонд у, ахæм дон нуазынæн нæ бæззы.
Ныртæккæ та сæ уавæр аивта, æмæ сæ цинæн кæрон нæй. Районы разамынд зæгъынц, баивтой Кировы уынгæй Брытъиаты Елбыздыхъойы уынджы онг хæтæлы уаццаг 500 метры дæргъы. Куыстытæ бакодта муниципалон унитарон куыстуат «Алагиркоммунресурсы»-йы специалисттæ.
Фарстамæ ргом аздахын æмæ йæ алыг кæнынæн баххуыс кодта регионæн разамынд дæттыны Центры. Организацийы цы сæрмагонд системæ сфидар кодтой, уый фæрцы монитринг цæуы социалон хызты, æмæ æркæсынц адæмы хъæстытæм.
Системæ комментаритæ ссары коды дзырдтæм гæсгæ. Ацы хатт ахæм дзырдтæ уыдысты «мусор» æмæ «свалка». Æмтгæй райсгæйæ, мониторинг аххæссы бирæ фарстатыл. Сæ фылдæр баст вæййынц фæндæгтимæ, рухсытимæ æмæ æндæр ахсджиаг хъуыддæгтимæ. Иууылдæр рахæссынц иумæйаг экранмæ. Уым алыхуызон фарстатæ сбæрæг кæнынц хицæн хуызтæй. Æппæтæй фылдæр хъæстытæ кæм вæййы, уыдон нысангонд сты сырх хуызæй. Картæмæ цæст дарынц куыд центры, афтæ республикæйы сæргълæууæджы кабинеты дæр. Уымæй дарддæр бæрæггæнæнтæ бахæццæ вæййынц нæ бæстæйы президенты аппаратмæ. Иумæйаг архайды фæрцы та куыст вæййы ахадгæдæр. Иу къабазы кусынц регионæн разамынд дæттыны центр æмæ цæрæнуæтты-коммуналон хæдзарады аналитикæйы æмæ мониторинджы ситуацион центр. Сæ цæст дарынц коммуналон фарстатæм.
Æппæт информаци арвитынц федералон центрмæ.
Регионæн разамынд дæттыны центры зæгъынц, ахæм куысты фæтк фадат дæтты кæрæдзийæн æххуыс кæнынæн. Арæх бæрнон службæтæм курдиæттæ фыссыны бæсты фаг вæййы сыхаг кабинетмæ бацæуын. Уымæ гæсгæ алы хъастмæ æркæсынæн цалдæргай сахаттæ хардз кæнын нал хъæуы.
Организацийы зæгъынц, адæймаг цы комментарий ныууадзы, уымæй аразгæ вæййы, фарста куыд тагъд алыг кæндзысты, уый. Бæлвырд æмæ комкоммæ фарста фæстауæрц кæны йæ алыг кæныны рæстæг.
