Ацы категорийы адæмæн коронавирусы ныхмæ тынг зын тох кæнæн у
Дзыллон иммунизацийы рæстæг стыр æргом аздахын хъæуы, 60 азæй фылдæр кæуыл цæуы, æмæ чи нæ дзæбæх кæны, ахæм низтæй рынчын адæммæ. Уыцы низтæм хауынц сæкæрниз, бронхæты астмæ, зæрдæйы æмæ тугдадзинты системæйы низтæ. Ацы категорийы адæмæн коронавирусы ныхмæ тынг зын тох кæнæн у. Уымæ гæсгæ ахсджиаг у рагацау æнæниздзинадыл ахъуыды кæнын, зæгъынц специалисттæ. Вакцинацийы тыххæй бæлвырддæр радзурдзæн Гуытъиаты Алинæ.
Елена Кочегарова вакцинаци скæныны размæ бирæ фæхъуыды кодта. Иуæй коронавирусæй дæр тæрсы, фæлæ йæм сæкæрниз дæр хæццæ кæны. Хатдзæг рахаста дохтыримæ бæлвырд консультацийы фæстæ. Специалисты хъуыдымæ гæсгæ йын вакцинаци æнæацæугæ нæ уыд.
Татьяна Ивановæ куыд дзуры, афтæмæй вакинацийы фæстæ йæхимæ ницы æппæрцæг æууæлтæ сбæрæг кодта. Фæлæ æмбары, йæ цард цас фенцондæр ис, уый. Йæ бон у адæмы астæумæ цæуын, стæй йæхи ирхæфсын театры.
Эндокринологон диспансеры специалисттæ вакцинацийы размæ бæлвырд кæсынц алы рынчыны низы историмæ æмæ йын бæрæг кæнынц йе нæниздзинады уавæр. Вакцинаци сеппæтæн нæ бæззы — зæгъынц дохтыртæ.
Вакцинаци æнæниздзинадæн пайда кæй у, уый тыххæй дохтыртæ дзурынц алы рынчынæн дæр.
Тотраты Ирмæ диабетæй рынчын у аст азы дæргъы. Куыд зæгъы, афтæмæй уыцы низы тыххæй зоны алцыдæр. Абон дохтыры æркасты рæстæг рахаста фидар хатдзæг — æнæмæнгæй ацæудзæн вакцинаци.
Коронавирусы ныхмæ прививкæ скæнын кæй фæнды, уыдоны номхыгъдтæ диспансеры аразынц æрвылкъуыри. Дохтырты фиппаинагмæ, тæссаг низæй хи бахъахъхъæнын кæй фæнды, уыдоны нымæц бонæй бонмæ кæны фылдæр.
