Профилон ведомствæйы разамонæджы хæдивæг Уалыты Аланæ куыд радзырдта, афтæмæй республикæйы къаддæр кæны æгуыст адæмы нымæц
Хицауады сæрдары хæдивæг Азымты Иринæйы разамындæй ацыдис адæмæн куыстдæттыны координацион Комитеты æмбырд. Профилон ведомствæйы разамонæджы хæдивæг Уалыты Аланæ куыд радзырдта, афтæмæй республикæйы къаддæр кæны æгуыст адæмы нымæц. Ныртæккæ комитеты хыгъды лæууынц 17 мин адæймаджы онг, уыдонæй сæрмагонд фиддонтæ исынц 3 мины æмæ 800-йæ. Æгуыст адæмы нымæц кæй фæкъаддæр, ууыл фæзынд, карз цæттæдзинады фæтк кæй фæлæмæгъдæр кодтой, уый. Уæдæ куыстуæттæй бирæтæ базыдтой архайын панедмияйы уавæрты æмæ спайда кодтой паддзахадон фарсхæцты мадзæлттæй. Æгуыстдзинады бæрæггæнæнтæ фæхуыздæр кодтой, национ проект «Демографийы» фæлгæты цы мадзæлттæ сæххæст кодтой, уыдон дæр. Ацы аз куысты бынæттæ ссардтой цыппарсæдæ æхсай фондз адæймагæн, уыдонæй сæдæ æстай иу – социалон бадзырдты фæрцы. Æстдæс адæймаджы арвыстой рæстæгмæйы куыстытæм. Уалыты Аланæ куыд загъта, афтæмæй Комитет йæ куысты æнцой кæны президент Владимир Путины хæслæвæрдтыл æмæ архайы, цæмæй ацы азы кæронмæ баххæст кæной пандемияйы агъоммæ бæрæггæнæнтæ куысты бынæттæй. Уый тыххæй хъуамæ куысты бынæттæ радтой дыууын иу мин адæймагæн. Уыцы нысантæ сæххæст кæнынæн республикæйы Хицауад сфидар кодта сæрмагод мадзæлтты комплекс. Национ проект «Демографийы» фæрцы та профессионалон ахуырад ратдзысты цыппарсæдæ æстай иу адæймагæн. Уыдонæй куысты бынæттæ уыдзæнис æртæсæдæ æхсайæн. Адæмæн куыстдæттыны комитет æмæ йæ дæлхайæдтæ архайынц программæ «Поиск работы»-йы. Йæ нысан у, социалон уагæй бахъахъхъæнинаг чи у, уыцы адæмæн куысты бынæттæ ссарын. Ныртæккæ уал программæйы архайыны фæндон загътой 194. Æмбырды кæрон Азымты Иринæ бафиппайдта, цæмæй та нæ республикæйы сног кæной ваканситы армукъаты куыст.
